Laos nung adianu ana Khristan dangi meyip, kinungertemi merenshi

Vientiane, Aenjeti 09 (Agencies): Laos nung tetsür adianu ana tejen yimsü dang nungi Khrista dangi meyipba ajanga kinungertemi züka merneshi, sendaka ayu, kidang anogo pezü tashi shibanga ayu, saka parnok tamang memelenshi, ta ashi.
Arishi küm 17 tain Nani aser arishi küm 16 tain Nha Phong na kinunger kar ajanga osang tajung angashia 2016 küm tatemlen Khrista dangi meyip.
“Ozü kinunger kati kü dang osang tajung indang ashi. Pa ya ozü yimtsüng anasa aliba yimtsüng ka nung pastor lir. Ni angashiba ni kanga sapua aküm aser iba ajanga ni tamanger ka aküm,” ta Nani-i Khristanpur reshikangshiba mita reprangba telok, Open Doors dang ashi.
Iba sülen adianu ana ya arogo nung shilem agi tenzük, saka parnoki yimsü tasen agizükba nung taa liasü.
Tetsür ana indang tsürabur aser kinungertemi, shirnok akhi yimsü amanger, tena Yisu sülen anidaktsü telemtetba agiba anema nokdak.
“Kodang onok khen tenlakidangi ao, ozü kinungertemi onok dang kanga jashi. Parnoki küna dang maotsü ashi. Ozü kinungertemi kü dang tejenba yimsü dangi meyiptsü ashi aser ni memeyipra parnoki kü dak züka merenshitsü amokmeren,” ta Nani-i ashi.
Iba mapang adianu ana yagi memelenshi. Saka hopta asem lir, tetsür ana ya tekülemkidangi aoba mapang par kinungertemi tena sülen atsükshia anidaka arur tekülemki nungi atsüzük.
“Parnoki küna sendaka ayu aser kübui kenu dak azük, saka kü dakbo mazük,” ta Nani-i ashi.
Parnoki adianu ana ya par yimdaki anir oa tesem balala nung anogo ishika sendaka ayu.
“Parnoki ni kübu tambu’er kidangi anir ao aser küdang, “Nai tang tashi Tsüngrem dak amaner na? ta asüngdang. Ni yimsü tasenba medoktsü tashi sendaka ayutsü, ta amokmeren,” ta Nha Phong-i ashi.
Iba sülen anogo pezü lir adianu ana ya chiok.
“Yisu dak akhang-akhanga amangtsü asoshi telemtetba agiba ajanga ozü kinungertem kanga jashi,” ta Nha Phong-i ashi.
Iba ama reshikangshi süaka tetsür ana ya tamang nung tashi taitba aküm.
“Onoki tasü ita nokdaktsü asoshi tashi ya Tsüngrem nungi sempet agütsü südi, ta ni amanger. Tsüngremi asenok nem amangtsü asoshi tejangraba agütsür,” ta Nani-i ashi.
“Efesa 6 nung kanga junga shia lir. Taoba mapang nisungtemi raraba mapang, parnoki jung amshi, aser ni jung ama amangnür. Temenen nisungtemi lasang khaloktsüdang, ni kümzüktsü asoshi iba jung amshitsü. Anungji ni Yisu dak amangtsü,” ta Nani-sa shisem.
Nani aser Nha Phong na tebui jalatemi amangba yimsü anema nokdaker, saka pa kinungtsüi Khrista yimsü nung tejangraba ka-a jalatem den mapang shia tenla kidangi aoer.