Laos nung Asean foreign minister tem senden kadar

Vientiane, July 24 (Agencies) : Association of Southeast Asian Nations (Asean)-i Southeast Asia nung yimjung aser terenlok atema maneni meranga inyaktsü ta Deobarnü, July 24, 2016 nü nungi tenzükba senden nung nangzükogo.
49buba Asean Foreign Ministers Meeting (AMM) nung adentsü arur Foreign minister tem Laos Ato Kilonser Thongloun Sisoulith-i pela agizük aser pai, kecha miimbanga meyui nüngdakba olemtep akatsü ayongzük, ta Xinhua news agency osang ajanga metetdaktsü.
Thongloun-i secutiry tsütsü teti atalokba aser tang tasen ataloka tebilemtsü tem, alima tzü mopung melenshiba, alima nung pa sasa aruba lendong, refugee aser nisung shibelenba tebilemtsü aika aser rongsenkettsüng den tawa Britain European Union (EU) nungi anenba tebilemtsü tem lemsatep.
AMM sentong ya Laos yimtiba Vientiane nung ketdangser taintem aser diplomat tem olemtep ka akaba sülen Laos Foreign Minister Saleumxay Kommasith mendenbuba sür Southeast Asia aser international tebilemtsü koktettsü nükjidong nung amunger.
Asean nung minister 10 lir aser parnok den Chinese Foreign Minister Wang Yi, US Secretary of State John Kerry na den ano Japan nungi Fumio Kishida aser South Korea nungi Yun Byung-se nunger dena Asean Regional Forum aser East Asia Summit Foreign Ministers Meeting atema jebishinütsü.
Kasa senden nung India, Russia, Canada, Australia, New Zealand, aser EU nungi Foreign Minister tema adentsü.
Iba teloktep senden ya Vientiane yimti nung 17buba Asean plus Three Foreign Ministers’ Meeting (APT), 6buba East Asia Summit (EAS) Foreign Ministers’ Meeting, 23buba Asean Regional Forum (ARF) aser Southeast Asian Nuclear-Weapon-Free Zone (SEANWFZ) Treaty Commission tem dena akatsü.
Laos nung tang akaba AMM senden nung September 6 nungi 8, 2016 tashi akatsü aliba East Asia Summit atema tatembang telemtetba ka agitsü.