Lapok, Tashi Anga, Agi -T.Ken 119:25-32

Temang tsütsü temulungjang ulubaji lendong lir. Saka tanelaren temulung ulubaji temoatsü ka lir. “Kodang nai kü mulungjang uludaktsüdir, ni ne temelaba lemangi asemtsü” (t.32). Na temang nung temulungjang waka lira, nai talangka asema moutettsü, saka na tanelaren temulung ulura, nai Kibuba den jajatsü aser asemtsü renema alitsü aser Kibuba nükjidong atalokdaktsütsü. Tasemteperi pa alizüng atongtsü asoshi pa lemang shitak nung asemer aser iba jagi pa nem maneni asemtsü tashi agütsür. Tanü ibaji Tsüngremi asenok nungi aginer. Asenoki atongtsü asoshi Pa nükjitong ka lir aser anidaktsü asoshi lemang ka lir. Aser Pa O ajanga asenok nem tashi agütsür.
Temulung uluba tetezü kechi? Mezüngbuba, temulung ulubaji Tsüngrem nem temulungjang lapoktsüba lir. Ibai ochi temulungjang aser ashir, “Kibuba, ne O agi ni yirujaka ni ibai aginer.”
Tanabuba, temulung tului Tsüngremi mulungba nung tashi angar. Ibai ajemaluba temulungjang lir aser iba temulungjang yagi ashir, “O Tsüngrem, nai kechi shidir ni inyaktsü. Ni ne kilir. Na kü tesayur.”
Tasembuba, temulung tuluji Tsüngrem sentsüwangshi agi sünga lir. Ibai tepela mulungjang lir. Kar temulung tila aser temesü lir. Parnok alima tila nung alir aser parnok tangatetba tila lir. Tsüngrem taochi metetba aser ochi temetetba nung anitsübaji koda tesüngmangtsü mapa lir (2Peter 3:18)! Asenok litsü ulushir. Tamalen mengui aliba tang asenoki angur, kechi mangashi liasü tang angashir. Tsüngrem asenok nem taküm tulu agütsür kechiaser asenok temulung tulu kar.
Tsüngremer ochiba dangi ne mulung lapokjang aser Pai mulungba nung tashi angang. Tashi angaba mera shia ne temoatsü alitsü aser tenzükba ulushitsütsü. Item ajak rongnung tongtipangtibaji Tsüngremer sentsüwangshi agi sünga alibaji lir.