Lar tesayur MG Ramachandran leper anasa J. Jayalalithaa mang arem

Mongulbarnü Chennai nung Prime Minister, Narendra Modi-i asür J. Jayalalithaa indang mangjak nung tetushi agütsüdang agiba noksa angur. (Chennai, December 6)

Chennai, December 06 (Agencies) : Mongulbarnü Tamil Nadu Chief Minister, J Jayalalithaa tasümang Marina beach nung, la dang yimsüsübaren tsütsü shisa agütsür MG Ramachandran leper anasa state rangbeni akhümtsübu tulu agüja remogo.
Nikongdang 6:00 ako meta asüpila sentong tembangba sülen la mang inokba ‘sandalwood’ süngden ali telung nung rema yutsü. La lep aremba mapang akhümtsübu agütsüba tamaitsü prangpong kahtok aser tesem nung adenshia aliba nisung meyirjang aikati ‘Amma Vazhga’ (Long Live Amma) ta yimyim ayima liasü.
MGR Memorial Site nung Jayalalithaa den mapang talangka mulungtoka inyaka arula, Sasikala Natarajan aser AIADMK nung tongtiba nisung aser la tanük Deepak nati la den tatembang tepila sentong ketdangsüa liasü.
La lep nung naro aser sandalwood tanük prokloktsüba sülen ali nung arem.
La tasümang nunga lai kanga sapuba saree sentsü tanen sobutsü. AIADMK lenirtemi ashiba agi iba sentsü ya la atema tia tajung bener arutsüba sentsü lir.
Arishi küm 68 tain, Jayalalithaa ya Apollo Hospital nung Hombar aonung 11:30 ako meta temulungjang mapa meinyaki küma iba lima nungi pila. La iba mozüki nung September 22, 2016 nü nungi munga liasü.
Linük Tir, Pranab Mukherjee, Ato Kilonser Narendra Modi, Congress Tatong Tir, Rahul Gandhi, Union Minister Venkaiah Naidu, Chief Minister O Panneerselvam, state balala nungi chief minister tem, Angh Vidyasagar Rao, DMK lenir M K Stalin aser superstar Rajnikanth nungera Rajaji Hall nung la nem akhümtsübu agütsür rongnung liasü.
La tasümangji army gari ka nung Rajaji Hall nungi Marina Beach tashi bener ao. Panneerselvam, Sasikala aser tangar kar den iba gari nung mener ao.
Marina Beach matong tashi lenmang tezülen la mangyimertem jenti ajanga aodang iba gari kanga meilongi ao.
Marina Beach nung sepaitemi la nem akhümtsübu agütsüba sülen la tasümang glass süngden nungi sandalwood süngden nung melena enok.
Congress lenir Gandhi aser Ghulam Nabi Azad, Panneerselvam aser Tamil Nadu Angh C Vidyasagar Rao nungeri Jayalalithaa nem yangji naro yuja liasü.
La osang angashia nisung 3 asü, 2 soseta asütsü merang
Hombar nikongdang la temang kanga mejungi akümba osang angashia Tamil Nadu kübok Coimbatore yimti nung nisung asem aoksaa asü aser nisung ana soseta asütsü merang, ta Mongulbarnü police-i metetdaktsü.
Singanallur nung arishi küm 65 tain, noksa yanglur ka par kidang TV nung Jayalalithaa temang mejungi akümba osang angashidang teku nung tashitsü atua mozükidangi anir mao tsüngda asü, ta police-i ashi.
Ano Thudiyalur nung arishi küm 62 tain, Palaniammal-a lar kidang iba kasa osang TV nung angashir aoksar asü, ta police-isa ashi.
Ibaji mesüka Erode nunga arishi küm 38 tain, Raja-a iba osang angashir pa amenba menden nung tango mesashiteti aküm aser emergency service-i pa süogo ta ashi.
Kuniamuthur nungi Loganathan-i mobile tower feet 50 azük nungi pungzüka asütsümeranga lia police-i anizük. Ano arishi küm 45 tain, AIADMK worker, Ramachandran-i Annur anasa pasasa rongseta asütsü merangdang temang shilem noklang nung shilem 60 tashi rongsar sorkar mozüki ka nung yaridar, ta police-i shisem.
Nagaland Angh & CM nati asüku lemsar
Nagaland Angh, P.B Acharya aser Chief Minister, T.R Zeliang natia sangdong balala ajanga asür J. Jayalalithaa mang ayimba metetdaktsü.
Tenapronglai Nagaland nung aliba nübortem ajak tenüng nung Tamil Nadu nunger den asüku lemsateper ta metetdaktsü.