Las Vegas kenten sentong ka nung nisung 58 khaset

Las Vegas, October 2 (Agencies): Deobar aonung Las Vegas hotel ka nungi nisung kati kenten sentong nung adener nisung 58 khaset aser noklang aika yirutsü.
America putiotsü nung nisung aika tepsetba lendong atalokbatem rongnung iba ya tamajungtiba asütsü.
Las Vegas nung aliba Mandalay Bay Resort and Casino anasa amakba video ka nung kentener Jason Aldean-i Route 91 Harvest Festival nung ken tetendak nung injang khaloktsüba menüngoka lir.
“Clark County Fire Department-i tang tashi nung nisung 400 dak tema yiruba bushitetogo. Tasürtem rongnung Las Vegas police ketdangser ka dena liasü” ta Hombarnep Las Vegas Metropolitan Police Department nung Sheriff Joseph Lombardo-i osangbener dang ashi.
Lendong atalokba sülen SWAT units-i bushitepa aodang Mandalay Bay nung takdang ka nung injang khaloktsüsang angu saka pa sasa khaseter liasü. Iba takdang nung prangpong 10 dak tema yua liasü, ta sheriff-isa shisem.
Mezüng injang khaloktsüba osangji aonung 10:08 meta (par mapang) meta onok nem sangoktsü aser ayaterm matongdang Las Vegas police-i temulung melemi bilemer ka khasetogo ta osang aru, ta Joseph-isa metetdaktsü.
Injang khaloktsüsangji Mesquite, Nevada nung alir arishi küm 64 tain Stephen Paddock ta jangjaogo, ta paisa ashi.
Hombar anepdang züngia police-i Paddock’er ki mita reprangtsü atema search warrant ka agütsü.
Route 91 Harvest Festival ya anogo asemnü country music sentong ka lir aser Vegas Strip nung ayonga amunger. Deobar aonung sentongji tatembangba liasü.
Kenten sentong amungba tesemji Las Vegas Village and Festival Grounds lir aser iba ya MGM Resorts-i lapokba lir. Las Vegas Village and Festival Grounds ji ali acre 15 tasazük nung lir aser nisung 40,000 asemer.
Lendong atalokba sülen police-i Marilou Danley ta ser Paddock den aliba tetsür ka bushitsü tenzükogo.