Lashkar commander Bashir Lakshari den züngsem ana khaset

Srinagar, July 01 (Agencies): Honibarnü Kashmir, Anantnag district nung security sepaitemi kiralongrar telok, Lashkar-e-Taiba (LeT) commander, Bashir Lakshari den züngsem ana khasetogo.
Bashir ya taoba ita police trok tepsetba nung densema liasü.
Jammu & Kashmir DGP-i, Anantnag district nung sepaitemi Lakshari den par züngsem asem longbanga liasü, aser tanü khatepdang civilian tetsür kata khaset, ta metetdaktsü.
“Sepaitemi Bashir Lakshari den kiralongrar asem Anantnag district kübok Brenti yimdak longbanga liasü. June 16 nü Kashmir, Achabal tesem nung police ketdangser ka densema police trok tepsetba nung parnok densema liasü,” ta police otongdar kati metetdaktsü.
Sepai aser telungpur na tsüngda khatepdang tetsür ka asü aser nisung tenet yiru.
Telungpur atsüka aliba kidang nungjagi civilian 17 bo kümzükogo.
Arishi küm 44 tetsür ka tenüng agi, Tahira yirua district hospital-i anir ao, ajisüaka mekümzükteti asü, ta ketdangsertemi ashi.
Tanü nikongdang 3:00 ako meta security sepaitemi telungpurji longbang, iba mapang nung telungpur jagi parnok kümzüktsü atema civilian temji jung ama amshia liasü, ta police ketdangser kati ashi.
Iba sülen sepai aser telungpur na tsüngda khatep tenzükba injang ola angashia yimdaklirtemi lenmang nung adenshir India anema yimyim ayim aser telungpurtemji jena odaktsütsü atema parnoki sepaitem dak long agi aon tenzük, ta police-isa ashi.
June 16 nü SHO, Feroz Ahmed den police 5 Anantnag district tezülen tepsetba sülen J&K police-i Lakshari tepseter/apuer nem senpet lakh 12 agütsütsü, ta sangdonga liasü.