Lasüng aser onion achiba ajanga colorectal cancer adoktsü aliba nungi kümzüker

Lasüng, onion aser leek nung densema allium vegetables tem achiba ajanga colorectal cancer adoktsü aliba risk tajemba kümdaktsür, ta bushitsüngdangertemi ngutetba metetdaktsüogo.
Colorectal cancer ya cancer tapu rongnung ka lir aser iba ya colon mesera rectum nung adoker koba digestive tract tatembanglen lir.
Asia Pacific Journal of Clinical Oncology nung adoktsüba bushitsüngdang ajanga, allium vegetable aika achir aser tera dang achir na medemdangra allium vegetable aika achir dak colorectal cancer adoktsü shilem 79 agi tajemba aliba sayuogo.
“Onoki bushitsüngdang nung allium vegetable tem timba achiba ajanga tekümzükba tali agütsüba nutetogo,” ta China Medical University, First Hospital nungi bushitsüngdanger Zhi Li-i ashi.
“Tang ngutetba ajanga colorectal cancer nokdangtsü asoshi taküm yimya aser achiajemba ajanga teyari agütsüba ngutetogo, koba tali aroka ia bushitsüngdangtsü langa lir,” ta paisa ashi.
Iba bushitsüngdang atema colorectal cancer agi tonger alir parnok 833 aser iba tashidak agi metongi alir parnok 833 medemdanga liasü.
World Health Organization ajanga ashiba agi, colorectal cancer ya alima ajunga nung cancer tapu balala rongnung kanga dang bulua adongba tashidak ka lir aser teburtem dang kanga bulua adonger. Iba tashidak ajanga 2018 küm kija nisung 862,000 bo tepsetogo. Iba den bendenloksema iba tashidak ya India nung kanga bulua kümdar.