Lava-i Windows 10 enoka aliba Twinpad 2-in-1 Hybrid sayaogo

February 26, 2016 : Tanü Hokolbarnü Lava-i sen 15, 999 alanga Twinpad 2-in-1 laptop-tablet ka sayaogo. Iba laptop-tablet nung Windows 10 enokja lir aser linük nung aliba retail store, multi-brand outlets aser e-commerce websites ajak nungi alitettsü.

Iba tablet ya kaketshirtem aser mapa inyakertem asoshi atakteta yangluba lir, ta company sangdong ka ajanga metetdaktsüogo.

Lava Twinpad nung Sim Card ka dang amshitettsü aser iba ya 2-in-1 tablet ka lir. Iba tablet nung 10.1-inch WXGA (1280×800 pixels) resolution IPS screen keta lir aser ibaji ajanga tejaklen aser tesülen ajaklen amendaka yuteter. 2-in-1 tablet den agizüka yutetba keyboard ka aser stylus ka dener angutsü.

Tablet telung nung 1.3GHz quad-core Intel processor den 2GB RAM enokja lir. Iba den külemi tablet telung nungsa 32GB memory lir saka microSD card amshia 64GB tashi kümtettsü.

Tejaklen aser tesülen ajak 2-megapixel camera enokja lir aser tablet rangben ya 7400mAh battery ajanga tashi angur.

Iba hybrid tablet nung 3G, Wi-Fi, GPS aser Bluetooth v4.0 amshitettsü aser Micro-USB enokba tesem ana keta lir.

Iba tablet ya Silver sentsü nung angutsü.

“India nung tang ya tablet tsütsü terenlok adokba mapa ka lir ajisüaka ano phablets aser tablets na tsüngda junga mebendangteter. Lava nung onoki nüburtemi nüngdakba oset yanglutsü meranger. Twinpad ya computer den saku amshiteter anungji teti mazüngi aliba kaketshirtem aser lanur mapa inyakertem asoshi kanga nüngdakba oset ka lir,” ta Lava International Limited nung Tatong Tir aser Business Head Tablets Raman Sharma-i iba tablet sayaba mapang ashi.