Laver Cup nung Federer aser Nadal na longjemer asayatsü

Luchii/December 15, 2018 (Agencies): Grand Slam 20 tashi koker alisang Roger Federer aser Spain nunger nüngtugu tennis asayar Rafael Nadal na taruba Laver Cup nung tanaben longjemer asayatsü.
2017 küm iba asayamung nung asayar ana tebur tarep asaya nung mezüngbuba longjemer asayaba nguogo. Team Europe atema Federer-i takok bener arutsüba sülen Nadal-i pa dak asema arua azüitba nüburtem mulung nung tang tashi lir aser tang kasaji atalokdaktsütsü asoshi bilemdar.
Team Europe captain Bjorn Borg, iba osang angazüka kanga pelar aser küm asembuba iba asayamung akoktsü asoshi yongyaa atar.
“Geneva nung Laver Cup asayatsü atema Roger Federer o Rafael Nadal naprongla shimba dak alaka captain ka asoshi osang tajungba kecha mali. Iba asaya nung asayar tajungtiba ana longjemer asayaba reprangtsü ya iba asaya asoshi jangratemtsüka lir aser iba ajanga ano onoki Laver Cup küm asembuba atonga akoktsü asoshi jenjang tajungba ka nung toktsür,” ta Borg-i Laver Cup official website ajanga ashi.
Laver Cup ya taruba küm Switzerland nung akatsü aser iba ajanga iba asayamung ya Federer asoshi kanga tongtiba lir. Pai ashiba agi, Nadal parnok team nung aliba ya kanga tajung lir, kechiyong Grand Slam 17 ben koker alisang den asayatsü ya parnok asoshi kanga tasak süla.
“Laver Cup kanga takok ngua aoba ajanga asenok ajak jangra atemer. Küm ana tsüngda team anaprongla nungi iba asayamung nung shilem agirtem atema iba asayamung ya kanga tongtibang kümogo. Team Europe nungi asayatsü atema captain Bjorn-i Rafa künaprongla shimba atema kanga pelar. Prague nung küna jangratema asayaogo aser Switzerland nung tang longjemer asayatsü aliba ya kü asoshi kanga special asütsü,” ta Federer-i ashi.
Kasa mapang nung Nadal-ia iba asayamung nung shilem agitsü asoshi yongyaa ataba lemsatepogo.
“Ni taruba küm Geneva nung Laver Cup nung asayatsü kanga yongyaa atar aser captain Bjorn Borg-i ni team nung aniokba atema kanga pelar. Taoba küm Prague nung asayaba ama ni tajungtiba asayatsü merangtsü,” ta Nadal-i ashi.
Laver Cup ya anogo asem asayar kong Europe nungi tebur asayar tajungtiba trok alima ajunga nungi asayar tajungtiba trok den asayar, shirnok John McEnroe lenisüba kübo shilem agitsü.
2019 küm Laver Cup ya Rongjui/Sept 20 nungi 22 tashi Geneva, Switzerland nung asayatsü.