Lavrov-i UN Syria Envoy, Mistura den Moscow nung ajuruteptsü

Moscow, November 03 (Agencies): Russia Foreign Minister, Sergei Lavrov-i United Nations (UN)’er Syria ambassador, Staffan de Mistura den Moscow yimtiba nung asüng, Bodbar nü ajuruteptsü sentong renemogo.

“Küm 4 tejaklen nungi tenzüka Syria nung adokba mangatettepbaren agientsü nükjidong nung Syria sorkar aser sorkar anemer na tsüngda yimjung tezüngzüktep agitsü asoshi telok anaprongla ajungshitsü onüktem benoka jembitsü nükjidong nung ozü lenir, Lavrov-i UN ambassador, Mistura den ajuruteptsü sentong renema lir,” ta Russia Foreign Ministry otongdar, Maria Zakharova-i tanü osang jangjashitsü.

UN-i ayonger Austria kübok Vienna yimti nung taoba Hokolbar nü amenba Syria yimjung senden nung shilem agir US, Iran aser Saudi Arabia lenirtem densema, alima tongti lenir 17 rong nung Lavrov o Mistura nata densema liasü.

Ajisüaka, Vienna nung senden nung Syria Tir, Bashar al-Assad-i aniba Syria sorkar aser sorkar anemertem ka dang mejaokba osang jangjaogo.

Aji oda, Syria’er mangatettepbaren agiena par linük temzüng tasen lateta UN-i ketdangsüa election agitsü alizüng ajangzüktsü nükjidong nung Syria sorkar aser sorkar anemer na tsüngda yimjung tezüngzüktep agitsü ajungshitsü asoshi Vienna nung amenba senden nung shilem agirtemi UN nem nunglokja lir.

Vienna senden nung agiba telemtetba osang lemsateptsü aser yimjung tezüngzüktep agitsü asoshi tamendakdak onüktem renemtsü asoshi Mistura-i taoba hopta tatemlen Damascus yimti semdanga telok anaprongla nung lenirtem den ajurutepba osanga jangjaogo.

Ano külen, Syria sorkar aser sorkar anemertem Moscow yimti taruba hopta jaoka parnok den arok senden ka amentsü sentong renemba osang ka Russia Deputy Foreign Minister, Mikhail Bogdanov-ia tanü metetdaktsüogo.