Law azüngertemi “govt. law college” lapoktsü akanger

City Law College, Dimapur nung azüngertemi state goverment dang Govt. Law College lapoktsü takhangba agüja longkak aitba noksa nung angur. July 07, 2016.

Kohima & Dimapur, July 7 (TYO): Nagaland kümer küm 50 dak tali süiaka, tang tashi Nagaland nung government meyong law college kata maliba ajanga law züngnertem timtem aika ajurudagi. Item timtemji metetdakja Brehostibar nü Nagaland nung law azüngertemi Govt. Law College lapoktsüla ta takangba agüja longkak aita mongogo.
Iba longkak aitba sentong ya Nagaland Law Students’ Federation (NLSF) teloki ayongzükba liasü. Tang Nagaland nung private-i lapokba law college asem, Kohima, Mokokchung aser Dimapur nung kaka lir.
Tanü Brehostibar nü law azüngertem longkak aitba sentong ya Kohima, Dimapur aser Mokokchung nung pei pei college nung agia liasü.
Kohima nunga Nagaland angh alidaki aoba lenmang anasa lapoka aliba  Kohima Law College nung longkak aitba sentong agiba sülen kaketshirtem taginübaji tezüluba nung Nagaland angh aser Chief Minister na nem agütsü.
Iba longkak aitba sentong nung Kohima aser Dimapur nung Law College Students’ Union (KLCSU) nung lenirtemi jembidang, Nagaland kümer küm 50 dak tali süiaka, government-i law college kata melapoktetba atema mepelaba metetdaktsü.
Nagaland nung government law college alitsü nüngdakba indang state government dak shijen shiaka temulung magütsür aser iba jagi Naga nunger law azüngertem kanga akoksadagi ta kaketshir lenirtemisa metetdaktsü.
Iba kasa sentong nung NLSF tir Wb. Lanusowai jembidanbg, state government-i Nagaland nung law college nüngdakba indangbo süoki ia mebilemer saka maparen ajak nung ochimashi mapa nungbo kanga temulung agüja inyaker, iba jagi tanü kaketshirtem tejashi nung parnok nüngdak meshia  longkak aittsüsa akümer ta paisa ashi.
Law azüngtsüba ya temelabo masü, kechiyong kiojen tajung den tesayur tajung, library aser nüngdakba aika lir, anungji sorkari item nüngdakji meteta Naga nunger lanurtem rongnung takar aser sensakertem ajaki züngtettsüsa Govt. law College alitsüla ta NLSF lenirisa metetdaktsü.
Kohima nung NLSF purtemi ayongba longkak aitba sentong nung  Kohima Law College nung principal-ia kaketshirtem pu sema jembia liasü. Laisa Law azüngertemi akangba ama state sorkari inyaktsütsüla ta metetdaktsü.
Dimapur nunga City Law College nung azüngertemi parnok college campus nung longkak aitba sentong nung  Nagaland Law Students’s Federation (NLSF) tongti zülur, Mekhru-i jembidang, NLSF teloki state sorkar nem  government law college ka lapoktsü asoshi takangba agütsogo, kechiyong tanga subject nung temulung agüja inyakba ama Law nunga kanga temulung agütsütsü nüngdaker ka metetdaktsü.
Iba kasa sentong nung City Law College principal, Wb.P Leonard Aier-i jembidang, linük nung Govt. Law College kata makaba state-bo Nagaland dang asütsü, anungji tanü Law azüngertemi akangbaji state government-i ataloktsütsüla ta metetdaktsü.
Iba sentong nung City Law College Students’ Union nung tir aser Dimapur Naga Students’ Union (DNSU) nung tir Wb. Sungkum Aier natia jembia liasü.
Nagaland nung Government Law College kabosa akatsü nüngdakba agi, NLSF teloki August 8, 2015 nü state government nem tezüluba nung iba takangba ya agütsü, ajisüaka tanü tashi kecha telangzüba mali ta kaketshir lenirtemi metetdaktsü.
Parnoki akangba mataloktsü tashi longkak aitba sentong tesashiba ayongzüka kayonga aotsü ta  NLSF lenirtemisa metetdaktsü.