Law Commission-i IPC nung ‘sedition’ ozüng reprangshimer

New Delhi, March 1 (Agencies) : Mongulbarnü Union Home Ministry-i Parliament nung Law Commission kati sedition ozüng reprangshidar ta metetdaktsü.
Ministry of Law and Justice-i Law Commission dang Indian Penal Code, 1860 nung Arrla 124A (sedition) nung aliba onüktem aser teinyaktsütem reprangshitsü atema asüngdanga liasü, ta tanü Minister of State for Home, Haribhai Parathibhai Chaudhary-i Lok Sabha nung ashi.
JNU kaketshirtem Kanhaiya Kumar, Umar Khalid aser tangartem linük anema mapa inyak ta tai tonglokja apuba sülen iba mapa ya inyaker.
Osang angazükba agi, Law Commission jagi onük kar ajitetogo aser itemji reprangshimtsü atema sub-group kar tenteta lir.
JNU nung sentong ka agidang linük anema yimyim ayim ta ashishitep onük adokba sülen sedition ozüng atema o atsüteptsü tenzük. Nisung aikati Jawaharlal Nehru University kaketshir lennir Kanhaiya Kumar sedition law kübok aitsüba anema ola adoker.
“December 11, 2014 nü Law Commission-i iba ozüng nung tebilemdangtsü aliba onük kar ajitet aser iba asoshi sub group tem tenteta lir” ta Minister of State for Home-isa tanü Lok Sabha nung metetdaktsü.