Law Commission-i tasüba temerenshi agientsü benokba Home Ministry-i magizüker

New Delhi, October 04 (Agencies): Law Commission-i tasüba temerenshi agientsü benokogo, ajisüaka ibaji Home Ministry-i magizüktsü akok.
Kiralongraba mapa aliba ajanga tasüba temerenshi khenyongi agientsü asoshi ano mapang matong, ta Home Ministry-i shiogo.
Union Home Secretary, Rajiv Mehrishi aser tanga ketdangsertemi Law Commission indang osang nung o lemtep kanga junga kaa liasü.
“Ministry telung nung aser Law Ministry den o lemtep maneni kadar, aser tatembang telemtetba ka tan hopta agitsü akok. Tasüba temerenshi agientsü benokbaji magizüktsü akok,” ta Home Ministry nung tongti ketdangser kati ashi.
Law Commission-i agütsüba osang nung, züngsem timbai kiralongraba dak sentakba ken o tem dak alaka tasüba temerenshiji agientsüla ta ashir. Ajisüaka züngsem 9 aliba ludeni benokbaji ajaki mulungba masü, kechiyong züngsem asem- full-time züngsem ka aser sorkar ketdangser züngsem ana, ta parnokibo tasüba temerenshi magiennür.
Iba luden nung sorkar tenüng nungi züngsem P K Malhotra (Law Secretary) aser Sanjay Singh (Legislative Secretary) natibo ibaji magizüker. Tena dak alia luden züngsem Justice (Retd) Usha Mehra-ia ibaji magizüker.
Commisssion-i agütsüba kasa osangji Supreme Court nem-a agüja ibaji shisadangtsü asoshi asüngdangogo.