Law Commission-i tasüba temerenshi agientsü benoker

New Delhi, August 31 (Agencies): Law Commission of India-i kiralongraba aser linük anema rara ayongba keno tem dak alaka tanga ken o balala asoshibo tasüba temerenshi agientsü asoshi benokdangogo.
Law Commission-i sorkar dangi benokba report nungji, obendangertemi ‘rarest of rare’ tangatetba nung tasüba temerenshi alitsü obendang agütsüba inyakyimji Linük Temzüng den meputep, ta shia lir.
Law Comission nung Justice AP Shah densema züngsem trok-i iba report nungji sign süogo. Ajisüaka iba Commission nungsa züngsem asem- Justice (Retd) Usha Mehra, Law Secretary aser Secy, Legislative Department nungeribo magizük.
Commission ajangasa, tasüba temerenshi agientsü atemaji mapang telemsa yur inyaktettsü, ta ashi.
Tang alima nung tasüba temerenshi agütsüba linük 60 rongnung India densema lir.
1993 küm Mumbai amakba ken o nung aibelener Yakub Memon taküm July ita nung alenseta südaktsüba nung ajemdaker o atsütepba mapang ka nung Commission-i tasüba temerenshi agientsü asoshi benokogo.