Lebanon nung ministry training sentong nung timtem ajuru

Beirut, Aami 22 (Agencies): Nisung shia indang ID card nung dena tamangba yimsü inoka amshiba linük ka nung Horizons International ajanga Khristanpur dang parnok tesem nung aliba Muslim nunger den Tsüngrem osang lemsateptsü tesayuba agütsür.
Houssney aser Horizons teloki tawa Lebanon nung Engaging Islam Institute nüngja agütsür training sentong ka tembangogo. Iba sentong ya Aami/June 4 nungi 15, 2018 tashi agi aser nisung 140 jungnüa arua aden. Iba training ya timba classroom nung dang agi, saka parnoki Muslim nunger den osangtajung lemsateptsü mechi Laishiba aser Khristan indang t-shirt tem bener tesem balalai yok.
“Iba training nung Muslim nunger tamangba yimsü angatetdaktsütsü aser koba yimya nung parnok den osangtajung lemsateptsü, item ajak sayu,” ta Houssney-i ashi.
“Online, video, audio aser tsüngtong oa onoki alima tesem balala nung training agütsür. Muslim nunger den metettepa alir ajunga temulung meyipdaktsütsüsa osangtajung lemsateptsüla,” ta Houssney-isa shisem.
Saka iba tesem nung timtem ajurur aser yangji alir Khristanpur-a Horizon ajanga mapa inyakba ngua mepelar. Tamanger aikati Muslim nunger dang temeim sayutsü ya magizüker. Horizon student ka aser Muslim nunger ka sensaksemba mapang nisung ka tiyongi aita Muslim nungba kabu nung aliba Laishiba rakzüka indoktsü.
“Iba amala sentong nung Khristanpur noklang aika training agüja Muslim nunger den Tsüngrem mapa inyaktsü atema tesayuba balala agütsür aser iba ajanga Muslim nungertem Khristan akümba indang meteta nüburtem pelateper,” ta Houssney-i ashi.
Aser Muslim nunger tali Khrista dangi aruba ngua nüburtemi osangtajung lemsatsü tejangraba tali adoker.
“Yangi Beirut nung training agir 135 rongnung Islam nungi meyiper nisung ter dak tali lir aser parnoki Muslim nunger den Tsüngrem mapa inyaktsü angazükba ngua sentong ya tajungba akümer,” ta parnokisa ashi.
Saka nütsüng renlokba ya kisüng masü, Tsüngremi aginüba ama taküm alitsüla,” ta Houssney-i ashir.