LeBron James Cavs toktsür Lakers nung denogo

Chiteni/July 2, 2018 (Agencies): Hopta ishika Cleveland Cavaliers nung pa tarutsü indang mejangjai arur NBA asemben tashi kokteter alisang LeBron James-i Tentonü Los Angeles Lakers nungi küm pezü asayatsü asoshi telemtetba agiogo. Pa ya USD million 154 agi alizük. James-i Instagram ajanga Cavaliers pur den tipila osang lemsatep. “Northeast Ohio dang kanga pelar, season pezü tashi jangratema asayaogo aser iba mapang NBA most valuable player pezüben aser 14-time All Star jenjang ajangtetogo.”
Iba sülen mapang tatsüka lir James indang agency ajanga pa Los Angeles-i aoba osang sangdonga liasü. Lakers puri NBA 16 ben kokogo ajisüaka season pongu tashi atonga tamakok anguba sülen tang yanglushiba mapang ka lir.
“LeBron James, NBA MVP pezüben, NBA finals MVP asemben, NBA All Star 14ben aser Olympic nung gold anaben tashi nguogo, pai Los Angeles Lakers nungi küm pezü asayatsü asoshi USD million 154 agi tezüngzüktepba ka yangluogo,’ ta Klutch Sports Group-i Twitter janga metetdaktsü.
Nüngtugu football asayar Zlatan Ibrahimovic shiba LA Galaxy nungi asayar pai Twitter ajanga James LA Lakers-i pelashishia jaokogo. Tweet ka nung Zlatan-i yamai zülutsü, “LA nung tang tsüngrem ka aser chuba ka lir.”
Taoba mapang Lakers nungi nüngtugu asayar Kobe Bryant-ia James pelashishia agizükogo.
James, Lakers nung adenba sülen parnok ya Western Conference nung tetokteper tajang ka asütsü imlar kong Golden State Warriors puri Cavaliers koka taoba NBA title pezü nungi asem koker lir.
James mezüng 2003 küm Cavaliers nung aden aser iba sülen pa 2010 küm Miami Heat-i ao. Heats pur final pezü tashi nung shilem agitsüsa aniba sülen pa tanaben 2014 küm Cleveland-i meyipa aru aser 2016 küm NBA akok.