Lee Chong Wei-i 6buba Japan open nung takok angu

Tokyo, September 25 (Agencies) : Japan Open tebur kija final asaya nung Deobarnü Malaysia nunger Lee Chong Wei-i Denmark nunger Jan O Jorgensen madak takok ngua iba asayamong takok marok benogo.
Tesüiba Olympic asem nung silver medal abensang, Lee-i 21-18, 15-21, 21-16 agi Jan madak takok angu.
Arishi küm 33 tain, world number one, Lee-i Tokyo Metropolitan Gymnasium nung asayaba iba asayamong nung khen danga tamakok mongui tua final nung takok angu. Ajisüaka final asaya nungbo kanga petepa asaya.
2014, 2013, 2012, 2010 aser 2007 kümtem Japan Open marok abensang, Lee-i Rio de Janeiro nung tatem asayatsü ta shia liasü saka ano Tokyo 2020 Olympics nung shilem agia gold medal angutsü merangtsü shishiogo.
Tetsür tarep asayaba nung Rio Olympics mapang silver medal angula ana-Denmark nungi Christinna Pedersen aser Kamilla Rytter Juhl nati Rio final nung makokla ana- Japan tsür Misaki Matsumoto aser Ayaka Takahashi na madak 19-21, 21-18, 21-12 agi tan asayamong final asaya nung takok ngua Rio nung tenati makokba mang yangogo.
Tetsür kija final asayaba nung China nungi He Bingjiao-i China nungisa Sun Yu madak 21-14, 7-21, 21-18 agi takok angu.
Sun-i semi final asaya nung Japan tsür world no 12, Akane Yamaguchi koker final atong.
Ano tebur tanep final asaya nung China nungi Li Junhui aser Liu Yuchen nati Korea nunger Kim Gi-jung aser Ko Sung-hyun na madak 21-12, 21-12 agi takok nguogo.