Lee Jae-yong tepuokdak küm 12 ayutsüla: Prosecutor

Seoul, August 07 (Agencies): Senotsü ochimashi aser sübokrem amshiba ken o nung South Korea tir, Park Geun-hye menden nungi alutsüsa aküm aser iba kasa ken o dak sendakba nung Samsung tekolakba küm 12 tepuokdak ayutsü asoshi prosecutor temi akhanger.
Seoul Central District Court nung ita pezü tashi ken o angadanga arur Hombarnü tatemsaba kuli agütsüdang Lee Jae-yong nüktzü yima jembi aser Park indang yimten yimsüsüba nungi teyari angutsü mechi lar medemer Choi Soon-sil indang foundation nem sen tenla aika agütsü ta aija aliba ya tai, ta ashi.
Lee ya Samsung indang vice-president lir saka 2014 küm tebu Lee Kun-hee temolungjang agi mapa junga meinyaki akümba ajanga tebu melen iba Samsung company nung tekolakba ama lia aru. Kibur nungi temelaba melie senotsü mesüra rongsen nung kibur akümba, tajangzük angutsü mechi senotsü amshiba aser tezüngzüktep agidang aibelena kuli akütsüba amala ken o nung ajemdaker Jae-yong ya February ita apu.
“Company atema mesüra kü nija tajangzük angutsü asoshi ni tir densema shinga danga kodanga kicha masüngdang,” ta South Korea nung takartiba kibong indang senmanger-i court nung ashi.
“Iba ama tejashi aser khuret agütsüba asoshi ni sasa bilemer,” ta pai shisem.
Pa pua ken o jembiba ya tim masü aser pa ita trok tepuokdak ayudang ajak sayuogo, ta Jae-yong-i ashi.
Park indang ken o nung Samsung densemba ajanga South Korea indang sorkar ya takar aser tashi tait kibong mesüra nisungtemi dang amokbanga amshiba sayur, ta prosecutor temi ashir.
Lee kümzüktsü mechi Jae-yong-i kuli tiazü agütsü, ta special prosecutor Park Yong-soo-i aitsür.
South Korea indang GDP den sako senotsü bendentetba Samsung company ajanga prosecutor temi akhangba nung kicha shia mali. Court ajanga iba ken o nung obendang ya August 25 nung agütsütsü lir.