Left, Janata-i Agri Min anendaktsütsü akhanger

New Delhi, July 27, 2015 : CPI-M nung Tongti Tezülur Sitaram Yechury-i tesüiba Ato Kilonser HD Deve Gowda aluyimertem atema lumiba mapang ajurutepba noksa nung angur.

 New Delhi, July 27 (Agencies): Agriculture Minister Radha Mohan Singh-i aluyimer tem asüba nung ken o mekümdangi jembiba nung ajemdaker Left party aser Janata Parivar teloki, Singh, tatar nungi anendakjang ta sorkar dang takhangba agütsüogo aser iba den külemi JD-U-i Rajya Sabha nung pa aitsüba ken o benokogo.

Tesüiba Ato Kilonser H D Devegowda-i Janata Parivar aser Left party tem constituency ajak den iba ken o asoshi olemtep agidang sorkari aluyimertem sentokba asoshi Jantar Mantar nung lumi.

Taoba hopta parliament nungi Agriculture Minister-i aluyimertem soseta asüba nung tezüluba ka ajanga telangzüba agütsüdang pai ‘temeim nung mangatettep’ adokba ajanga item tasüba ataloker, ta langzüba ajanga opposition party tem ajungmeso aser sorkar anema apusütsü tenzük.

Singh-i “Kibong mangatettep, shirang-shiji, temesepba mozü aser chiyungtsü achiba, kibong akümtsü rongsen magütsütetba, temeim nung mangatettep aser pei tashi maitba ajanga aluyimertem soseta asür, ta National Crime Records Bureau ajanga putet,” ta ashi.

JD-U nung tekolakba Sharad Yadav, CPI-M nung tongti tezülur Sitaram Yechury, CPI nung lenir D Raja aser Samajwadi Party nungi Dharmendra Yadav nungeri anir iba takhangba agütsü.

Gowda, “Telangzüba tamajung rongnung tan Agriculture Ministeri langzüba ya ka lir…. Iba amala telangzüba ya Ato Kiloner Modi-ia kodaser agizükteter. Iba yabo aitsütsüla,” ta ashi.

Taküm aluyimer paikati laluba ya kanga tesasatsü ka lir ta ashiba mapang pai, iba ya ajanga rara adoktsü, ta ashi.

Yadav-i, iba ken o nung ajemdaker parliament telung aser tema ajak nung opposition-i sorkar akoktsü. Anungji sorkari tatok meshitsüla mesüra Singh anendaktsütsüla, ta ashi.

JD-U züngsem K C Tyagi-i Rajya Sabha nung Rule 187 nung ajemdaker Singh aitsüba mapang, “pai parliament kjia anisa’er masü saka aluyimertem soseta asüba shitakba tatlokba nung o melenshir,” ta shia liasü.

“Singh-i langzüba o ya parliament mezüngmeshiba o lir. Linük nung aluyimer tem soseta asüba tali akümer. Tzü-mopung agi alu raksatsüba mapang parnok yarir masü iba amala mezüng meshi o jembiba ajanga Devegowda dena lumitsüsa akümer,” ta paisa ashi.