Legislator in-charge-i anir Peren semdang

Peren DTF for Covid-19 pur senden ka May 21, 2020 nü amenba noksa nung angur.

Dimapur, Monupii/May 21 (TYO): Legislator in-charge of Peren District COVID-19, Namri Nchang, Advisor for Water Resources aser Minister, Higher &Technical Education & Tribal Affairs, Temjen Imna Along den Opposition lenir T.R. Zeliang nungertemi May 21, 2020 nü Peren semdanga Peren DTF, department ketdangser, Peren district nung civil society aser arogo tentet balala den DC Conference Hall, District Hq. Peren nung senden ka mena liasü.
Iba senden nung CMO Peren ajanga Peren district nung shimteta aliba COVID Hospital CHC Jalukie nung hadir aliba indang osang tongmelang agi lemsatep. District nung COVID-19 tashidak putetba dak sendakba nung nüngdakba osettem timba akümtsü, ta pai ashi.
Senden nung Minister Imna Along-i ashiba agi, district kümzüka ayutsü ya District Administration aser sendaktep aliba nüburtem dak keta lir, anungji iba tashidak wara den raraba nung civil society aser arogo ajaki maneni District Administration den yariteptsüla.
Political party telemsa makai COVID tensa mapang ajak tangatettep nung inyaktsü asoshi pai ajungshi aser District Administration aser Medical team dang thermal screening agiba dak alia danga state nungi meyipa shilangertem ya junga tentangtsüla aser virus prokshiba nungi kümzüktsü mechi pei yimtsüng nung aliba quarantine centre-i arrsanga meyoktsüla, ta ashi.
Kasa mapang Minister Imna Along-isa Deputy Commissioner, Peren, shiba DTF Chairman lir, pa dang Legislator in-charge aser Peren District COVID-19 DTF züngsemtem den teti sendaktepa alitsü mechi Peren District COVID-19 WhatsApp group lapok nung ajungtsü, ta ashi.
Asenok ya tenük agi manguba rara raradagi aser asen jakdang lendong lir, anungji iba tashidak wara den raraba mapang asen sasa asen dak temolung lema malitsüla, ta kasa senden nung T.R. Zeliang-i ashi.
Yakpang sür inyaker kümzüka ayutsü ya Medical Department khuret lir aser department ajanga civil society lenirtem, arogo lenirtem, yimtsüng nung lenirtem, yakpang sür inyakertem atema iba tashidak metetjema alitsüba sentongtem yanglua agitsüla aser tekeratiba nung Peren atema quarantine totuyubatem yanglutsüla, ta paisa ashi.
Advisor Namri Nchang-ia nüburtem dang yimya tajung amshia sorkari totuyuba agüja aliba sülen anidaktsü ajungshi.
Paisa District Administration nem tenüngdang agütsü aser iba ama tensa nung District Administration aser Medical Department den yaritepba atema district nung civil society aser arogo tem dang pelaba lemsatep.
Iba sülen parnokisa DTF züngsemtem aser Peren District COVID-19 Joint Action Committee tem den Chennai nungi meyipa shilangertem koma anepalutsü, ta asüba onük nung shisadokten agia liasü.