Lemsachenlok-i Conservation of Wildlife Species award angu

Dimapur, Monupii/May 23 (TYO): Küm ana shia India Biodiversity Award sentong akar aser taküm küm India Biodiversity Award 2018, International Day for Biological Diversity den repsema Telangana Agriculture University nung Action for Biodiversity küm 25 ajungba monga liasü.
Küm shia nisung noklang aikati category balala nung India Biodiversity Awards atema atenüng agutsür aser iba award atema mongintemi akumba National team-i asadanga tendanger. Ajioda taküm iba award atema nisung 200 daka temai tenüng agutsüba nungi nisung 20 dang shim aser parnok rongnnung Longleng district kübok Yaongyimchen yim nungi Lemsachenlok telok densema liasü.
Lemsachenlok-i Conservation of Wildlife Species Category nung takok ngua liasü aser Telangana den Karnataka Angh-i iba awards agütsü.
Yaongyimchen Community Biodiversity Conservation Society LEMSACHENLOK took-i 2008 küm nungi Community Biodiversity Conservation mapatong agizüka inyaker aser iba küm nungjagi tenzüka parnoki inyakba ajanga joko tesamar aliba shiruru aika Conserved areas-i aruogo.
Community Conservation nung kanga takok angubaji Amur Falcons (molulem ozü) amongba lir. Tesüiba küm 2-3 tsüngda molulem lakh 10 dak tema Yaongyimchen Community Biodiversity Area nung mongogo.
Iba dak sendakba nung Community Biodiversity Conservation Society tenüng nung Nuklo Phom-i Nagaland sorkar, talisa Forest & Wildlife department-i iba award atema Yaongyimchen tenüng agütsüba asoshi pelaba lemsatepogo.
Paisa iba mapatong nung yaritepba atema Longleng District Administration nung taoba ketdangsertem aser tang teinyakdak ketdangsetem, Phom People’s Councils aser lokti tentet balala ajak dang pelaba lemsatep.
Iba dak alia parnokisa Wildlife Institute Dehradun danga pelaba lemsatepogo.
Nuklo Phom-isa yimertem, taintem, ketdangsertem, staff, lanurtem aser sesotemi parnok mapatong nung shilem agia yariba atema pelaba metetdaktsü.
Molulem aika nung satellite tag inokja lir, ajisüaka transmitter aika mapa meinyaki kümogo saka 2016 küm “Longleng” ta nüngja jaoktsür aliba satellite transmitter dang mapa inyakdar. Longleng ji Queen of Nagaland ama züngshidar aser tang Siberia-i meyipa aotsü atema China nung lir.