Lendong aketba ki !

Menoknok indang bushidangertemi Himalaya tenemtsünglen aliba limatem nung memenui menoknok tuluka anoktsü ta shinba asenoki angashiogo. Iba sülen ano menoknok anokba indang bushir mongin katibo Himalaya tenemtsünglen menoknok tulu anoktsü ta shinbaji tamamangtsü o lir, kechiyong menoknok anoktsüba indangbo shingaia jelia metakzütetter ta ashiba o a angashiogo. Anungji, Himalaya tenemtsünglen aliba lima Northeast India kübok aliba stata-tem ama nung menoknok anoktsübaji shingaia tejangja meshitetter. Ajisüaka, ochi o kaji Himalaya tenemtsünglen aliba limatem Nagaland ya dena menoknok anoktsüba tesem intang amendaka lir, ibayongji menoknok anoktsübaji kodangar ashitsü makok saka menoknok sashisashia kenbosa anoktsü ta asüba shisabolubo asenok ajak dak aitadokogo. Iba shisabolu jagi asenoka komala ki ka nung alir (?) mesüra komala ki ka nung mapa inyaker (?) ta shisadangtsübaji kanga tongtibang kümogo. Tan ita January 4 anepdang menoknok anokbaji yaküm küm Nepal nung anokba menoknok den medemdangra kanga agia tilaba liasü. Ajisüaka, iba jagia Manipur nungbo ki chirepa nisung asüba osang asenoki angashiogo. Ibaji asenok ajak asoshi taoksatsü aser tekümdangtsü mapa ka asütsü. Asenok asoshibo tia tajung kaji menoknok yamato sashia anokaka kecha nunga ki chirepa nisung asüama takoksa ajuruba osang mali asü. Ibaji tesüngmangtsüka lir ! Asenoki asen lima nung longki amentepa tua yanglubatem ya reprangdangra tetsüintsüka lir, kechiyong item kitemji menoknok anokyonga melaotsüsa kisüjensü nung tashitemetetter aser mongintemi repranga asüba mali. Aji oda, asenok ki kar asenoksasa purateta tsümar kisürtem den angatetteper amentepa tua yanglubatem lir. Ano, ki karbo kisüjensü nung mongintemi asameyanga yutsüba nung amendaker asüba asüyonga menoknok anokdang melaotsüsa bilema yangluba kibo kata malitsü südi. Itemji asenok asoshi lendong aketba kitem lir. Aji oda, asenbo azü ki tilaka nungang lia alitsü akok saka asen kidanger aser kiyongertemi asen li akümbanga ki talang aser tulu yanglua atuba jagi asenoka menonok lendong nungibo mekümzüktettsü. Ano, asen kibo menoknok anokyonga mechireptsüsa jungjunga yanglua alitsüa akok saka asen mapa inyakdak ki junga yanglua melira kodangang kechi ataloktsüar memetet nungji, lendongbang nung oa anogo shia amener amai asütsü. Tatishitsü agi, contractor kati office ki tuluka yanglu. Iba office ki yangludangji pai lisem tamajung amshi aser cement agi matu yanglu. Ano, ki amendaktsü asoshi ali atubajia junga matu aser yin (iron rod) tajung mamshi. Anungji, sen aika meindoki kiji renem aser tagitsü tajangzük aika liasü. Iba tajangzükji department nung tuluba nungi tilaba tashi terarabo ataa agi. Ajisüaka, kenlir menoknok tuluka anok, idangji office kiji chirepa yangji inyaker ajak taküm sama. Iba tesamaji shiba tai ajanga atalok asütsü ? Iba tesamaji shibai koma menoktsü ? Tanübo yangi shitakbabo matalok saka shisabolua bilemba tatishitsü ka amshia zülur. Ajisüaka, memenui asenok daka ataloktsüa akok. Aji oda, tang ama menoknok anoker ano tuluba anoktsü südi ta shisabolua bilemba mapang ya asenok alidak aser mapa inyakdak kiojen shitak aser jungjunga yanglutsüba indang jembitsü kanga nüngdaker. Asenoki metettsüba kaji, menoknok agibo nisung masür mesüra meyirur saka menoknok anokdang kiojen chirepba agi nisungtem asür aser yirur. Aji oda, asenoki itemji junga mebilemdangi tanü tajangzük angutsü asoshi dang bilema asen alitsü ki mesüra nübortem mapa inyakdak ki yanglura, ibajibo asensasa asen asütsü sang yanglur amai asütsü. Talisa, Municipal aser town council alidak towntem nungbo tanga yimtitem nung amato ki yanglutsü asoshi temelaba meshir külen dang südaktsütsüla. Tang amaisa yimti nung kiojen yanglutsü kecha telatet ozüng ka maka, pei yanglunütsü yanglu nungbo, talitsüba ki masü saka ajak külemi aremtsü leper yamglur asütsü.