Lendong asoshi renemba

Nagaland nunga ajungben alima lendongtsüdong tuluka atalok nunga nübortem kümzüktsü asoshi komaka renema lir ta tendangba sentong ka tesem balala nung yakanü ayongzüka agiogo. Nagaland nung ataloktsüba alima lendongtem rongnung tetsübutsükaji menonok lendong asütsü. Tsüngremi meimba agi tanü tashibo Nagaland nung nisung aika taküm aser kiojen samatsüsabo menonok lendong ataloka mali. Ajisüaka, menoknok anokba indang bushidangertemi bushitetba agi, alima nung menonok anokba lenmang agi Nagaland ya kongshia lir, anungji mashi mapang ka nung tanga tesemtem nung atalokba ama Nagaland nung menoknok tulu anoktsü ana nung lir. Ano shisabolutsükaji, tashitemetetertemi alima nung tsünglu aser yipru mopong kong kodang arutsü ajibo jelia shitetter saka menoknok yabo kodang kong anoktsüar meshitetter, anungji menonok anokdang asenok shinga lendongi maitsüsa renema atatsübaji kanga tongtibang kümogo. Ibayongji, state ajak nung  pei pei government-i akok tashi nübortem dang kisüjensüba mapatem nungi tenzüker menoknok anokdang pei taküm kümzüktsü asoshi dang masü saka lendong nung alirtema dena yaritettsüsa teinyaktsü mapatem sayur. Asenoki metettsüba kaji, menoknok anokdang taküm samaba aser yiruyipong lendong atalokba ya menoknok agi masü saka menoknok anokdang kiojen chirepba ajanga ataloker. Iba tangatetba nungji asen alitsüba ki asüyonga mesüra nübortem mapa inyakdak office mesüra shishilembadak kitem asüyonga menoknok anokdang mechireptsüsa akangakanga yanglutsübaji kanga nüngdak lir. Tanü asüng balaka town nung dang masü saka yimtak yimtsüngtem nung dena longki amentepa tua asür saka itemji menoknok anokyonga mechireptsüsa jungjunga asadanger yanglur masü saka tapi agi peii aginüba apia yanglur. Ano, town nung balaka tesem aika nung longki talanglang atongtepa tua asür saka itemji ali jagi melaa ali mali aser kechi koma lisem, cement aser merang osettem amshia yangluar, itemji mita repranger mali pei yanglunütsü yanglur. Ano, tetsübutsüka tesem aika nung alibo tashimait aser longpang saka sen akaba agi sen teimba angutsü arishia longki talanglang atongtepa asür. Itemji angudangbo kanga shisabolua aiter kechiyong tanga lima nung anokba ama menoknok tesashi manokyonga, asen lima nungbo menonok teraka dang anok nung itemjibo kidang marok atongtepa ayuba laor amai dang laotsü. Idangjibo, iba kidangji alirtem dang masü saka kidanger aser kiyongertem dena taküm samatsüsa adoktsü. Asenoki mebilemdangi pei ajangzüktsü asoshi dang bilema morumorua inyakdang kodanga memenoktettsüsa ataloktsüba lendongji aji asütsü. Ano, Nagaland yimti aika nung nija kitembo yutsür government office-tem aika lisem aser merang osettem tamajung amshia yangluba kitem alitsü. Ano, office ki karbo tejen bendoker tasen yanglutsü mapang agi tonger tang tashi amshia alitsü. Ashiko, district headquaters kar nungbo DC amenba kijiang tashimaitba alitsüa akok. Aji oda, menoknok lendong atalokdang kiyong ajak nung longkitem chirepa ki aika nembang, gari lenmang dena anenzüka ao, light yindong laoa yinzü petdangba agi light marur ta ajuruba lendong nung ano külen DC amenba office nungang lendong tuluba atalokra, shibai shiba yaritsü ? Atangji, menoknok anokyonga ki mechirepra, apu melaora aser lenmang meraksara nisungtemi peisasa pei taküm kümzüktettsü aser lendong nung alirtema yaritettsü, ajisüaka tang ama mapang ka Nagaland nung menoknok anok nungbo yakanü tendangba mapatemji kata mapa küma meinyaktettsü. Tenokdanger aser terepranger mali, ki tulu aser talang teimbaka menoknok anok manok ka laotsüsa yanglua lir, tanga apu aika ajanga gari sadema mesenzütetter, tanga lenmangjibo yutsür Kohima nung Chief minister office-i aiba lenmang tama anenzüka aotsüba tia nung lir. Alima lendongtsüdong mapang kümzüktsü asoshi inyakba mapatem ya asayamenüa tenüng ka agi inyaktsüba mapa ka masü, anungji government-i lendong atalokba mapang kümzüktsü asoshi dang masü saka lendong madak ano lendong mataloktsüsa  ozüng shitak amshia kanga süoki ia inyaktsüla.