Lendong atalokdaktsür ajunga ozüngi melaba ama merenshitsüla: Ban

United Nations, November 26 (Agencies): Alima ajunga nung lendong atalokdaktsürtem talisa, kiralongrartem pua parnok ozüngi melaba ama merenshitsü tajungshiba olen ka United Nations (UN) Secretary General, Ban Ki-moon-i tanü Brehostibar nü sangoktsüogo.

India aser Pakistan na tsüngda tesendaktep tajungba akümba ajanga par linük ana densemba tesem nung kiralongrartemi lendong atalokdaktsübaren tajemba akümtsü imlaba olena pai lemsatepa liasü.

2008 küm November ita 26 nü Mumbai lendong ataloker küm 7 abensaba bilemteta, Ban-i tanü iba olenji metetdaktsü.

“Alima tesem ajunga nung kiralongrartem ajunga pua parnok nem ozüngi melaba ama tapet temerenshi agütsütsüla,” ta pai nenshia ashi.

“Kiralongrartemi lendong balala atalokdaktsüba ajanga alima tesem ajunga nung tensa mejungi kümdaktsütsü tenzükogo,” ta shia, parnoki lendong atalokdaktsüba ajanga takoksa jenti bener arutsüba osanga bushiteta lir ta Ban-i metetdaktsü.

Ano, kiralongrar ajunga meshi meshia samatsütsü mapatong nung UN nung züngsemba linüktemi bendanga agüja tongti shilem agitsü tayongzükba ka pai tanü sangoktsü.

Ano külen, Pakistan okadak benokba Mumbai nung 26/11 lendong atalokdaktsür den sentakba ken o atsünglangshia tanü tashi abilener nem tapet temerenshi magütsüi aliba osang bushiteta lir.

“Pakistan nung tentetba okadaki telemtetba agia Mumbai lendong atalokdaktsüsang, Zaki-ur-Rehman chiokba sülen India-i Rehman memerenshi chiokba ken o UN Security Council’er Al-Qaeda Sanctions Committee nung benokba osanga angazükogo,” ta Ban-i metetdaktsü.