Lendong atalokdaktsür ta temulung malemer nisung 2 Paris tonga anir ogo

Vienna, July 30 (Agencies): France yitmiba, Paris nung yaküm, 2015 küm November ita lendong atalokdaktsür den sentaktepa alir ta temulung melemi bilema apuba nisung 2 tashi Austria linük nungi Paris yimti tonga anir aoba osang ka Austria kübok Salzburg yimti nung tentetba prosecutor office-i yashi, Hokolbar nü sangoktsüogo.
Paris yimti nung nisung 130 shi tepseta lendong kanga sashia atalokdaktsüba sülen iba lendong atalokdaktsür ta temulung melemi bilema tan Paris tonga anir aor, Algeria nunger arishi küm 29 tain aser Pakistan nunger arishi küm 35 tain anaji Austria nung tentetba refugee nisungtem jenokdak atsüka lia, apuba osang jangjaogo.
Tan Paris tonga anir aor nisung 2 jagi Iraq nunger 2 den aroki Syria toktsür Greece kübok Leros asetkong tonga aoba osang bushiteta lir.
Tenati aroki Leros asetkong tonga aor Iraq nunger ana jagi Paris kübok Stade de France stadium nung pokshiba lendong tesashi yaküm November  ita 13 nü atalokdaktsü.
Leros asetkong nung passport tendangdang tan Paris tonga anir aor anaji yaküm October ita 3 nü apu saka tenaprongla hopta 3 tashi pua ayuba sülen chiokadok.
Tena chiokba sülen nisung ana jagi Austria bushia ao saka Austria sorkari tena tanaben apu.
France sorkari European arrest warrant agütsüba sülen nisung anaji Austria nungi Paris tonga anir aoba olen ka Salzburg prosecutor office-isa shisem.