Lendong mapang

Tang ya Naga yimtem tebilemtsü latettsü asoshi In-dia sorkar den NSCN-IM teloki jembir aser parnoki metetdaktsübaji shitak asünungbo memenui telatetba tajung kati arutsü imlar. Ajisüaka, iba ama telatetba tajung ka asoshi imlaseta atadang shisabolutsüka lir aser ibaji Naga nunger mulungtet teloktem o NSCN-IM na tsüngda kati ka aitsüteptsüsa ken o bolutsüsa adokba ya asütsü. ACAUT telok ya Nagaland nung ochimashi aser tashiyim agi sarusachiba mapatem anema nokdaktsü asoshi tentetba telok ka lir. Atangji, tanü tensa nübortem timtem, takoksa aser tetsübu tia nungi kümzüktsü asoshi ACAUT teloki kecha tetsübu aser tarendak melii inyakba angur. Parnoki Naga nunger linük tenzükertem telok balala paikaya lemsar aliba ya ka küma melongjem tashi Naga yimten nüchiso bushiba tenüng nung saruba saru kecha telok nema magütsütsüla ta nübortem nem metetdakja lir. Atangji, ACAUT telok ya mulungtet telok ka dang lir, parnoki nübortem nem ozüng agütsütsü makok saka parnoki ashibaji nübortemi angara, parnoki kechi inyaker aji parnok ajungtsü asoshi masü saka nübortem asoshi inyaker ta nübortemi angateta anidaker ta angatetter. Iba ama mapang ka nung NSCN-IM teloki department balala nung sorkar mapa inyakertem shia nungi sen saruba anema ACAUT teloki nokdakbaji kanga tasü itta inyakdagi ta ajaki reprangdagi. Atangji, state sorkar mapa inyakertem dang nungi saru sarubaji state sorkari reprangtsüla saka mereprangtetba kuliji parnoki dang metet. Ajisüaka, ACAUT telok o NSCN-IM na tsüngda jashiteptsüsa ken o adokba ya state sorkari mangu aser memetet amai yutsüra state sorkar nung alirtem asoshi dang masü saka nübortem ajak asoshi lendongji aji asütsü. Naga nunger asoshi tebilemtsü onüktemji oagi Delhi nung tang India sorkar o NSCN-IM na tsüngda tejembidak onüktemji dang masü saka aruagi tang Nagaland nung tatalokdak mapatem ya kasa Naga nunger asoshi tebilemtsü asütsü. Item ajakji asenok asoshi tebilemtsü ta angateta state aser mulungtet telok ajaki temulung agüja inyaktsü kanga tenüngdaktsü kümogo. Naga nunger yimten tebilemtsü ya kar atema dang masü saka Naga nunger ajak tebilemtsü lir. Ashiko, Naga nunger karibo Naga yimten tebilemtsü dak aketba tebilemtsütem ya NSCN mesüra NNC mesüra ACAUT telok ama lokti tentettem tebilemtsü amai bilema alitsüa akok. Ajisüaka, iba tebilemtsü yagi meteta aser memeteti Naga nunger kibong ajak dak kongshir aser kongshitsü. Aji oda, ACAUT teloki Naga nunger linük tenzükertem melongjem tashi saru magütsütsüla ta nokdaker aser NSCN-IM teloki agütsütsüla ta akanger ta asüba tsüngda nungji ajak atema lendong keta lir. Ibayongji, Nagaland Tribes Council (NTC) telokia parnoki bilemba ken o metetdaktsüogo. Aji oda, NSCN-IM teloki ACAUT purtem tsübudakja sangdongbaji tangar bendanger sobaliba, anungji linük tenzükertem telok tenüng denbo mapeter, kechiyong tangar nem asenok tsübudakja amokmeren mesüdaktsütsü asoshi Naga yimten temeten bushir ta NTC teloki metetdaktsüba nungji ajak asoshi tebilemdangtsü ken o keta lir. Atangji, ano Naga nunger lokti tentet aika lir aser iba ama lendong aketba ken o tatsük talem jembidang ajemajema melii pei bilemba ken o lemsateptsü tim. Asenoki aiben lendong timtem  ataloker dang tesasaba aser taitsüba ken o metetdaktsür. Ibajia shitak saka menur shitakba inyakba jagibo tajangzükbo magütsür. Naga nungertemi metettsübaji Naga yimten ken o Delhi nung jembiaka Nagaland nung asenok putepa melira Delhi nungji junga mejembitettsü. Ashiko, Delhi nunga Naga nunger yimten ken o telemtetba kati maruteti küm paikaya aruba ya Nagaland nung asenok tebilemtsü aliba agi asütsüa akok. Aji oda, asenoki kümdanga aser Tsüngrem dang taochi aser shisatsü meshia meinyakra, asenok rongnung lendong timtem tulu adoka rongrongshishi tenzüktsü ana nung lir. Idangjibo, telongpur temapur kecha mali ajak akoksatsü aser India tsüngdang asenok menüdong akümtsü.