Lendong tulu paidokogo

Asüng Nagaland nung February ka nü municipal aser town council election agitsüba ya election masü saka government o nübortem na tsüngda tongpang rara ka amato ataloktsüba lia ita ana asoshi thitemba ya Tsüngremi Naga nungertemi tan Deobar nü sarasademba langzüba taochi ka asütsü ta amanger. Iba ama ken o tasak tatembang kati arua latettettsüsa tetsüngda nung arogo nung sannüker aser lenirtemi tebang iagi state government o Joint Co-Ordination Committee(JCC)na tsüngda tangatettep kati arudaktsütetbaji arogo lenirtem asoshia takok tuluka asütsü. Talisa, Dimapur nung municipal council election agitsüba ya nübortemi memulungba sentong ka liasü, anungji election magidaktsütsü asoshi anogo tatazük makai mokdanga lia tangatettep kati arunungji mokdangba sentong agienogo. Iba kisüngjia nübortem asoshi takok tuluka asütsü. Ajisüaka, election magii thitemba ya mapa tatem masü saka tetenzüker asütsü. Aji oda, kechiba nübortemi election magidaktsütsü nokdang ? Parnok mepelaba aser taginübaji kechi liasü (?) ta bilemdangra, ano mapa tasak aika anendaka lir. Atangji, January 30 nü arogo lenirtemi tebang ia state government o JCC na tsüngda tangatettep ken o renembaji tatem masü saka ano kasa terenemba ken o ji cabinet aser State Election Commission nati reprangshir külenang telemtetba agitsü ta zülua lir. Atangji, ibaji tajidaktsüka, ajisüaka Nagaland Baptist Church Council dena renem nungji sorkari iba ken o nung jagi masetshitsü imlar. Ano, teinyaktsü kaji ita ana tsüngda Nagaland nung municipal aser town council election nübortemi ajaki shilem agia agitettsüsa JCC  lenirtemi tangatetba agüja aotsü nangzüka lir. Atangji,  ibaji mapa tulu aser khureta tulu. Aji oda, ita ana nung nübortem nem tangatetba agüja orr tetsürtem nem 33% reservation agütsübaji lia election agitsübaji nübortemi memulungtsü, kechiyong tang Dimapur nung dang masü saka Kohima aser Mokokchung municipal nung aser tanga town-tem Urban Local Bodies (ULB) election magidaktsütsü nokdangba kuliji tetsürtem asoshi menden 33% shiteta yutsüba onük ya lir. Item ajakji kodang asenoki jungjunga züngdanga aser bilemdanga odir, tanü cabinet mamen tashibo aser State Election Commission-i telemtetba ka magütsü tashibo kechi ataloktsüar memetetba  tensa tia ka nung lir. Ajisüaka, arogo lenirtem dena renemba ken o asünungji ajaki jembiba ama mapa küma inyaktsü imlar. Atangji, municipal aser town council election yagi Nagaland ajunga nung kongshir asünungji Nagaland nung aliba Naga kin ajaki agizüktettsüsa Nagaland Municipal Act ya ano khen reprangshia yanglushitsüla adoktsü. Item ajakji JCC leniba nung Nagaland nung aliba kin shia nungi lenirtem jadena shisalemsatepba sentong akatsü kanga nüngdaktsü. Tang ya Nagaland nung aliba Naga kin ajak longjema aliba telok tentet kata malinungji, iba senden jateptsüsa asenok asoshi külem sabang ka maka, anungji tang ULB election tebilemtsü ajanga Nagaland nung aliba Naga kin ajak telongjem ka tentetra, ano ULB election ama tebilemtsü koktettsü asoshi iba ama sabangjia tajung ka asütsü. Khen atema election-bo thitemogo, anungji kenbo tango sadoka anisüngzüker saka kodang agidir agiaka ULB election ya tipdema agitsüsa nübortemi aginüba ama municipal ozüng ya khen meyipa reprangshitsüsa adoktsü. Atangji, JCC yabo Dimapur kisüng asoshi tentet saka ULB election yabo Dimapur kija onük masü saka Nagaland ajak asoshi asünungji, anünga aliba khurettem ajak JCC-isa abentsüla aser parnok ajanga Nagaland nung aliba Naga nunger külem sabangji ka yanglutet nungbo, yangjibo ULB election onük dang masü saka Naga nunger ajungtsü atema ULB onük dang nungi tarokba aser tuluba jembitsüba sabang asütsü. Ibaji tanü asüngsa inyaktsüla. !