Lengrijan Village Council-i acha-ayanga gari lenmang yanglu

Dimapur, January 26 (TYO) : Lengrijan Village Council (LVC)-i par yimtsüng sasep nung maneni terenlok mapa inyakba den ano tangar asoshi tansütsü ka südakja, gari lenmang black carpeting/topping mapa inyakogo.
Küm aika iba gari lenmang ya senzüka tokja liasü aser Lengrijan Village Council kübok Grace aser Lemjem colony nung alirtemi tenla tajung agütsüba ajanga lenmangji yanglu, ta Council-i metetdaktsü.
Lengrijan yimtsüng kübok tesem ana nung gari lenmang yangluba nung sen lakh 15 den timba endokogo, ta parnokisa ashi.
Lemjen sector nung feet 500 shi gari lenmangji school tanur aser sentepi aoertem atema kanga dang tongtipang lenmang ka lir saka iba gari lenmang nung black topping khen danga moudangi liasü, ta LVC züngsemtemisa ashi.
Tzünglu aruba mapang iba lenmang nung tesenzü mejungi akümer saka tang carpeting mapa inyakba ajanga senzüsenbongertemi timtem majurutsü, ta parnokisa ashi.
LVC-i aiben bangdak department den ajurutepa colony lenmang yanglutsü atema shiogo saka kuli balala ajanga meyanglu. Aji agi, LVC-i Lengrijan nung alirtem aser temulungertem dang nungi pei akokba tenla bendentsü telemtetba agi, ta yimten lennirtemisa metetdaktsü.
“Public ajangzüktsü asoshi lenmang yangluba mapa asoshi tenla agütsürtem aser teyariteper ajak dang kanga pelar. Talisa iba mapa nung Khekhaho Ayemi-i teyari tulu agütsüba atema pa dang kanga pelar,” ta LVC, chairman N Meren Imchen-i ashi.
Taoba mapang Lengrijan Village Council (LVC)-i feet 2500 shi drainage slab yangluogo aser iba mapa ya-a kiyongertemi pei akokba tenla agütsüba ajanga yangluba lir.