Lenir agi anünger !

Ibai Nagaland nung alirtem asoshi yimten lenir bushiba mapang lir. Tetezü, tang dang nungi mera taketba aser tajungba alitsü asoshi Nagaland nung alir ajaki lenir tasen tajung ka aginür. Tetezü, tang tashi inyaka arur lenirtem shinga daka Naga nungertemi temulung masür. Khen ashitsübo, ibaji teka nung akaba agi tenük masüng makaba ka dang aginüa bushiba amato lir. Ajisüaka, tanü Nagaland nung alirtem tiaji ibaji lir. Ibaji tebu maliba chirnurtemang mesük. Atangji, lenirtem mena yur parnok dang temulung masüba indang jembir asünungji, khen bilemtsübo, parnok mezüngmeshir amato saka alima aser nübortem timatembabo miimshitsü makok, anungji nüngsen agia jembitsü aser zülutsüsa adoker. Aji oda, asenok timatemba tashidak miimshia ayubaji cancer akümtsüba dang, anungji asen lima tia tamajungba makümdang yakta anepalutsübaji senso shia khuret asütsü. Atangji, nisung ajak lenir mesütettsü aser menüngdaker saka lenir asütsübaji asenok atema nisung ka dang nüngdaker. Asenoki tang tashi nung inyaka arur chief minister shinga daka temulung masür aser ano tang teinyakdakbabo maginer. Iba terata aser kodamasüba tia nung Nagaland nung election tonga arur. US nung asembuba tir Thomas Jefferson-i ashi ama, koba lima nung südir süaka yimten yimsüsürtemji nübortem dak alang angur. Iba o ji Nagaland nung Naga nungertem asoshi kanga shitaka ta agizüker. Atangji, nübortemi nüngsen jembiba amato yimsüsürtemji majung asütsüa akok saka parnokji parnoksasa yimsüsür akümba purtem masü nübortemi shimtetbatem lir. Anungji, yimsüsürtem jungra nübortem nüngsang asütsü aser mejungra nübortem nüngsen asütsü. Aji oda, japujariba nübortemi japujariba yimsüsürtem angutsü, sen meimba aser sen yong pei temeten ayokba nübortemi sen meimba aser sen yong pei temeten ayokba yimsüsürtem angutsü. Tashitemetet aser tangatetba agi masü saka tashiyim aser mangatetba purtemi shimba yimsüsürtemjia kasa mashimemetet, tangatetba mali saka tashiyim agidang maparen ajak inyaka aoba yimsüsürtem angutsü. Aji oda, temzüng ozüng ajak ajemoka yutsür ozüng raksartemi shimba yimsüsürtemji ozüng raksartem dang asütsü. Iba amaji tebu mesük pei chir asoba amai, nübortem mesük yimsüsürtem angutsü. Aji oda, tanü asenok yimsüsürtem tajung süra asenok tajung aser parnok majung süra asenok majung asütsü. Iba tangatetba nung asenoki asen lima tajungba küma melenshitsü asoshi lenir tajung bushir süra asenok nübortem tamasa melenshitsüla. Nübortem melenshi nung dang lenirtema melenshitsü aser nübortem jakla yimya tajungba küma melenshi nung dang, asenok dak alang, lenir tajung angutsü. Aji oda, asenoki aginüba lenir tajung kaji asenoki tang asen nük agi mereprangtettsüa akok, ibaji Tsüngrem ket nung dang lir, anungji asenoki Tsüngrem dang dang meshitsüla. Ashiko, shitakba Nagaland yanglutsü asoshi asenok nem agütsütsüba lenirjibo David ama arem nungang mesüra alu nungang pei mapa inyaka alitsüa akok. Aji oda, asenoki shitakba yamai asen lima agi asen nümamedangtettsüsa melinüra Tsüngrem dang lenir tajung ka meshitsüla. Iba sarasadem aser teyongyabaji ataloktsüsa asenok dak aketba ochimashi, sen meimba, pei temeten aser aküm mapayuba, japujari, asüküm aser azümesen jakla yimyatem ajak endoktsüla. Iba amaji asenok taküm aser temulungjang tasen küma memelenshi tashi asenok nem asenoki maginüba lenirtem dang agütsütsü ta asenoki angatetdi. Aji oda, asen lima nung temelenshi tajung ka adoktsübaji tamasa asen dak nungi adoktsüla. Idangjiang asenok mesük lenir tajung ka Tsüngremi asenok aser asenok chirnur aser parnok chir aser chirnurtem asoshi moatsütsü.