Lenir aika rongnung tai shimtet !

Linük nung Lok sabha election agitsü asoshi anogo 100 shi dang lir, anungji külen BJP aser külen Congress teloki anir I.N.D.I.A telongjem purtem candidate shimba mapang lir. Ajisüaka, I.N.D.I.A telongjem nung shimba lenir Congress tir Mallikarjun Kharge-i BJP telok akoktsüsa sentong yanglua anir aoba mangur. Kharge ya ozüng metetba okatsür aser Congress telok nung lenir taintem rongnung ka lir, anungji pai züngashia metetba aser Congress nung taküm bendanga agüja tenzüka aruba apibo pa Congress tir inyaktsü langa lir. Ibaji dang masü saka pa ya linük nung teküpbok jenjang nung alir Dalit kin nungi lir, iba jagi nübortem aika mulung akoktsü imlar. Ajisüaka, yimten telok anitsüba yabo züngashia metetba aser lokti nung temulung agüja tenzüka aruba kija agibo nunger moutetter, kechiyong lenir ka dakji lokti atsür aruba sempet alitsüla aser lanurtemi sapuba nisung ka asütsüla. Tanü iba sempetji Kharge aser Rahul Gandhi na dak mangur. Tenapronglaji ochishir, tenendak aser nübor meimba shisatsü aketba nisung asütsüa akok saka iba kisüng jagi Narendra Modi koka masayatettsü. Atangji, Congress telok kijaibo BJP telok makoktsü ta angatetba agi Congress teloki anir BJP telok anemer regional party ajak agi 27 jadena parnok telongjem tenüngji Indian National Developmental Inclusive Alliance (INDIA) ta jajet. Iba telongjem nung Congress den tongtibang yimten teloktem Nitish Kumar-i aniba Janata Dal (United), Mamata Banerjee-i aniba Trinomol Congress aser Arvind Kejriwal-i aniba Aam Admi Party purtem liasü. Ajisüaka, tenzük metenzük ka Nitish Kumar-bo tanaben meyipa orr BJP teloki aniba NDA telongjem nung denogo. Ashiko, Nitish Kumar nükjidongji I.N.D.I.A telongjem tenüng nung pa ato kilonser (prime minister) asütsüsa tenüngtuteta shimdaktsünüa asütsüa akok, saka Mamata Banerjee aser Arvind Kejriwal natiang Congress tir Kharge-ji I.N.D.I.A  telongjem nung lenir asütsüla ta shidangba agi Nitish Kumar pongmang yangji atem südi. Tetezü, Nitish Kumar-i BJP telongjem toktsür I.N.D.I.A telongjem nung adenbaji BJP maginüba agi masü saka pa ato kilonser kümnüba agi lenmang ka bushidangba dang liasü ta angateter. Iba jagi Nitish Kumar akoksatsü asü, ajangzüktsüar ajibo mapang agidang ashitsü, ajisüaka pa India ato kilonser akümtsüba lenmangbo mali kümogo. Atangji, I.N.D.I.A anitsü atema Congress tir shimbaji lenir aika rongnung nisung tai ka shim amai kümogo. Aji oda,  Kharge-i wainshin meteta parnok telongjem nung adener shia nem yimten khuret agüja tangatettep nung inyaktsü asoshi luden balala shimteta inyakba mangur. Ano, külen Rahul Gandhi-i anir India tesem ajak sema jajaba yagi parnok I.N.D.I.A telongjem nung meputepbaang tali jangjar. Atangji, AAP aser Congress na Punjab nungbo tangatettep agi pei pei toktep tokteptsü bangjemogo. Kasaji, West Bengal nunga TMC teloka parnoka parnok kisüng, shinga telok dena tangatettep meyanglu ser tokteptsü telemtetba agiogo. Ashiko, Delhi nungang Congress aser AAP na tangatettep nung tokteptsüa akok.  Aji oda, Bihar nung Lalu Prasad Yadav telok RJD aser UP nung Akhilesh Yadav telok Samajwadi Party purtem den Congress teloki komaka longjemer BJP den tokteptettsü ta asübaji INDIA asoshi kanga tongtibang kümogo. Atangji, I.N.D.I.A nung adener yimten telok ajak dakji linük asoshi tajung inyaktsü tebilemba lir, saka parnok longjembaji  linük asoshi mapa tajung ka inyaktsü nükjidong nung longjem masü saka BJP telok anemtsü asoshi longjemba dang lir. Iba jagibo nübortem mulungjang makoktsü aser parnok rongnunga aiben obang mapu adoktsü. Ashiko, I.N.D.I.A nung lenir ya Nitish Kumar südaktsür, election sülen takok ngua government akümtsüka süra parnok telongjem kübok aliba yimten telok kobai menden teimba ngudir, iba telok nungi shimtsü ta tangatetba ka ayu nunga jungla. Iba amaji masüyonga, ato kilonser asütsü nisung shimtsübajibo election sülen teloki mulungba ka shimdi ta tangatettep ken o ka ayuang I.N.D.I.A asoshi tajungba süla. Atangji, yimten nung tia melenteptsübaji kecha meteta maka, anungji taruba anogo 50 tsüngda Congress teloki lenisüba shisatsü aser sentong tajung ka I.N.D.I.A asoshi sayutet nungbo BJP telok asoshi nükenbelemtsüka süla.