Lenisüba tanela (Yohan 14:14-26)

– Rev.  Luin

“Ochi Tanelai nenok ajak ochiba dangi anitsü.” Yohan 16:13
Kibuba Yisui Tanela Temeshiji asenok Teyarir aser Lenir ta metetdaktsü. Pai asenok ochiba dangi anitsü. (Yn. 16:13).
Tanela Temeshiji tamanger shia dak alir aser tzüra temdaktsür. Kodang tesayuba Tsüngrem nungi mesülir idakji jangratem aser tipdem ka malitsü. Iba indang tenyar Yohani tejangja ashi. “Shirnoki nenok mashileni anisar, parnok indang ni item o nenok dangi züluogo. Pa nungi nenoki kechi mezüja shimtetba angu, aji nenok dak alinung, kari nenok dang sayutsü, aji nenok tenüngdaktsü maka. Saka Pai mezüja shimtetba jagi kechisarena indang nenok dang sayu nung, aser aji ochi asünung, tiyazü masü, aser aji agi nenok dang koda sayu, aji oda nenok dak liang” (1 Yn. 2:26,27). Iba osang yagi arogo nung tamangertem aintsü sayuba indang mashir (Ef. 4:11-13). Saka arogo nung tiyazü tesayurtem, shirnoki na ashioktsütsü meranger parnok indang jembir.
Tanela Temeshi asenok nem tiyazü tesayuba anema tekümdangtsü agütsür (1 Tim. 4:1). Tamanger kari tiyazü tesayuba kar mesüra jungkai adokba kar Khristan telok nung amshitsü merangdir pai Tanela Temeshi jashidaktsür !  Pai “tatok makaba temenen” menar! Iba yagi Lucifer nem masadangtetba maongka agütsür. Tanela Temeshiji ochi tanela, anungji tiyazü tesayuba agi pa peladaktsütsü makok.
Pauli 1 Tesalonikia 5:19-22 nung Tanela remsepdaktsüba mapa asem sayur.
1)  Sayutsüngiba mezüngmeshi masütsü
2)  Ajak tendanger tajungba ametang
3) Tamajung kechisarena nung pilaa liang. Tesalonika arogo nung Grik nunger süngyanglu külemba yimya tesayuba kar lir ta Pauli putet (Tesa. 3:5). Junga mangateti sayutsüngiba ajanga Asentenshi sayutsüngidang sayutsüngiri mezüngbuba onük nungji aibelener. Metendangi agizükba aser tamajung nungi pilaa maliba jagi ajemaluba Tsüngrem Tanela tali jashidaktsüra, aser asenok dak aliba Tanelaji remsemdaktsür, tangar tanelatem ajak sakdaktsür. Tanela Temeshi-i ola matoki tangar tanelatem inyakba ajia dangbo malitsü. Pa tenük meyiba Tanela lir!
Tanela Temeshi arung, kechiaser Na ajanga ainkartemi zülu aser jembi, ochiji lapokang, Na sapi lir, Temeshi Kaketji lapokang! (Charles Wesley, 1707-1788).

JUNGJUNGA MEYOKTEP
“Aser ochi nungi parnok tenarong meyipa otsü dangi aotsü, ibala mapang arutsü. Saka nai ajak nung teshisadang liang, timtem aremang, sayutsüngir mapa inyakang, ne tenzükba mapa abensajang!” (2 Tim. 4:4,5).
Yohan Baptitsüba pa mapa nung kanga nendaka jangraba tenzüker ka liasü. Kwikati Yohan ama tenzük parnok ajak Yisu sülen anidakertem aküm. Tanü azüngba Lai nung ajemdaker Yohan Baptitsüba aser tanü Khristan tenzükertem temetemdangba kar agütsür.
1.           Yohan tetsü bok nung alidang nungi Tanela Temeshi agi sünga liasü, saka tanü sayutsüngirtemi shirnok teperi ogo parnok tanela den sendakteper. Tsüngrem O pa dangi aru (Lk. 3:2); saka parnok dangi jungkai adokba aika zülua aliba Tsüngrem O den meputeper. Pa lisem lima nung alir ka, nüngtuku aginüba ajak nungi pilaa liasü, mepushi (Mt. 3:1); saka parnoki yimti nung alitsü meimer, aser konang bushir.
2.           Yohan Tsüngrem nungi aruba ola ka liasü (Yn. 1:23), saka tawa tanü sayutsüngir temesüktep kar ola ongmetang lir. Pai tenla sapang mebushi saka nisungtemi pa bushi, anungji pa osangji tangar den memeyoktep (Mt. 3:5, 6); saka parnok tenla sabang bushirtem lir aser parnok sayutsüngi dang parnok osang tajang masür aser tanaben majar.
3.             Kodang nisungtemi pa nungi angashi parnok temenen nungi temulung meyip (Mt. 3:6); saka kodang nisungtemi parnok nungi angashir parnoki parnok nem tenüngsang agütsür. Pai obendangba yakta arutsü ta ashi aser tangashirtem kümdangdaktsür (Mt. 3:10); saka parnoki tarutsü temoatsü, azükaru indang jembi aser parnok temulung lemdaktsü.
4.           Pai temulung memeyipba yimsü nung lenirtem dang per chirtem ta aja (Mt. 3:7); saka parnoki temulung memeyipba lenirtem dang parnok tashi mait aser nüngdak mashir.
5.            Yohani Alima Tesangwa asoshi kuli asü (Yn. 1:8,9), saka tawa tanü ainkartemi mangdang nung asüakümer. Pai Yisuji temenen bener Aosang aser Temeshitettsür ta sayu (Yn. 1:29; Mt. 3:12); saka parnoki Yisuji tebilemtsütem Bentettsür ka dang ta sangtonger.
6.            Pai sayatenya kecha meinyak saka Kibuba asoshi nüburtem renemdaktsü (Yn. 10:41; Lk. 1:16,17); saka parnoki sayatenya nung jangrar aser nisungtem memelenshi-i toktsür. Pai nüburtem dang parnok akaba nungi noklang shilem nung tenembo sensaker nem agüjang ta ashi (Lk. 3:11); parnoki nübur dang parnok ter shilem agüjang ta ashir aser parnoki temoatsü aginüra tenla agüjang ta zülur.
7.           Chubai nüktapangtaba asoshi pai chuba arütsü (Lk. 3:19-20); parnoki ochi mashi politician nem tenüngsang agütsür aser parnok maongka bushia süpokrem agütsür.
8.       Pai ashi, “Pa (Yisu) ulutsüla, saka ni asotsüla” (Yn. 3:30); saka parnoki Yisu tenüng nung parnok dak rangloker. Pai Pa nütsüngtem dang sarasademtsü sayu (Lk. 11:1); saka parnoki parnok nütsüngtem dang kechisarena ajak rateta zülutsü, atangji tenlaa dena, ashir.
9.           Pai chiyongtsü tongmelang chiyongtsü chiyong aser tongmelang sobutsü sobu (Mt. 3:4); saka parnoki lalushibonga sobur iba jagi tongmelang tamanger ratadaktsür.
Ni alidak Yohan Baptitsüba ama tongmelang taküm lia Alima Tesangwa asoshi ochi kuli süa alitsü yariang, Oba. Amen.