Lenla ajak nung sorkar den yariteptsüla: CM

Kohima, December 21 (TYO): Brihostibarnü Jalukie, ADC Hq. semzükba sentong nung Nagaland Chief Minister, T R Zeliang-i, tang jila jenjangi ajungketba jilatem nung temelenshi alitsü atema asenok jakdang mapa aser tayongzükba tulu lir, ta metetdaktsü.
Paisa, itemji atangji nung ataloktsü atema nüburtemi lenla ajak nung sorkar den amalitepa yariteptsüla, kechiyong longjemer inyakba ajanga takok angur, ta metetdaktsü.
Chief Minister-isa, ali kiburtemi kecha tetsükdaktsü magütsüi peipei li nung terenlok mapa inyakdaktsütsüla, kechiyong item mapaji ajanga tarutsü nung rongsenkettsüng jenjang ajungkettsü aser terenlok alitsü, ta ashi.
Paisa adenshia alirtem dang Jalukie indang temo aketba ali amshitsüla aser ‘Rice Bowl of Nagaland’ ta naroküm agüja alibaji wazüka ayutsüla, ta ayongzük.
Nagaland Express Highway, ya Mon nung Tizit nungi Peren nung Khelma aser Arunachal Trunk Road ya Global Tendering System kübok lir, ta metetdakja CM-isa Maram nungi Peren aser Jalukie adena Dimapur tashi two lane lenmang National Highway 129A ama 2015 küm November 3 nü Union Minister-i tenzüktsüogo, ta ashi.
CM-i, Ato kilonser, Narendra Modi-i Northeast nung gari lenmang terenlok atema sen crore meyirjang 90 sangdongogo, aser iba nungjagi Nagalnad shilem-a tuluka lir, ta metetdaktsü.
“Asenoki clean election atema jembir, ajisüaka ibaji atangji nung temerük asütsüla,” ta pai ashi.
“Naga yimtenren onük latettsüji ajak taginüba lir aser Naga yimtenren latettsü atema lenmang lapoktsütsü onoki renema lir,” ta paisa shisem.
Kasa sentong nung Home Minister, Kuzholuzo Nienu, Minister for Geology & Mining & Border Affairs, P. Longon, Horticulture Minister, DB & GB, Kejong Chang aser DC Peren, Smita Sarangi IAS nungeria jembia liasü.