Lenmang Nüka Yangludaktsütsüla

Dimapur nung kaketshir tentet asem- Ao Students Union Dimapur (ASUD), Dimapur Sumi Students Union (DSSU) aser Dimapur Lotha Students Union (DLSU)-i City Tower nungi DC Court junction lenmang ‘Tajen Ao Road’ ya tajungtiba nung yangludaktsüner ta takhangba agutsübaji tim dang. Iba ya kibur kati tenzükertem dang mapa shidak inyaktsü tuyuba mesüka asütsü. Kaketshir tentettemisa iba lenmang tayangludak ya mapangshia mita reprangtsü ta metetdaktsüogo, aser ibaji ajanga parnoki ajak dang tatishitsü tajung ka sayur asütsü. Hokolbar nikongdang ASUD Tir, Lanutoshi Aier den phone ajanga metetpeladang pai, “Naga nungeri nüngdakba infrastructure rongnung tongtibangtibaji lenmang tajung lir. Nagaland nung lenmang yanglutsü asoshi sen crore aika lemzükja mapa inyakaka ita ishika tsüngda lenmang nung senzü majung akümer,” ta lemsatep. Tesasaba olen ka nung pai, “Aiben contractor aser department nung inyakertemi ochimashi mapa benshiba ajanga lenmang atema sen lemzüka aliba ajak mamshir, aser ibaji reprangteta Dimapur nung kaketshir tentet balalai PWD dang lenmang junga yanglutsü takhangba ka agütsüogo” ta ashi. “Kaketshir taginubaji, lenmang yanglushitsü asoshi sen kwika lemzükja lir, iba senji tanga kecha atema masü saka lemteta aliba project asoshi dang amshitsula,” ta paisa tebilemba ka lemsatep. State semdanger bendangertem atema asen state koba tashika renloka lir, ibaji  gari tajung aika aliba agi masü saka gari lenmang ajanga dang asadangtsü. Asen state nung ketdangsertem aser takartemibo gari tajung aika alia amshiteper, ajisüaka asen lima nung aliba gari lenmang aser gari tajung naji meputep. Asenoka aikati tashitemetet nung tangar menepogo; libaliro, achiajem aser sübosülemtsü yimyatem agia tangar menepogo. Yamaji shia meteter, chiyungtsü tajung chir, apensüoshi tajung semer gari tajung nung senzüaka lenmang nungbo auyi chia senzür aser tzüngluruwa mapang lishitsüng nung senzür. Gari lenmang yanglutsü atema Centre nungi sen yokba apibo asen state nung highway ajak ya black topping mesüra ‘pakka’ bo toktsür ‘marble’ agia menokbangteter lila ta bilemer. Taküm Uttar Pradesh nungbo tzüngluruwa mongpu matongdang state sorkari anogo 40 atemzüker sen crore aika lemzükja state kübok gari lenmang 11,107 nung ongken ajak atepshia yangluogo. Iba maparen inyaktsü atema Chief Minister-i gari lenmang yanglushiba osettemji tajung amshitsü aser kanga junga yanglutsü atema nübur tenüng nung lenirtemi ketdangsüa repranga atadang gari lenmang teyangludakji video den-a agitsü tuyua liasü. UP Chief Minister-i, “UP nung gari lenmangji temeket state tem nung aliba gari lenmang dang nungi tajungba asütsüla” ta jembiba oji tanganütsüka lir. Aji oda Nagaland nunga tang teinyakdak aser tamalen inyaker Chief Minister temi “Nagaland nung gari lenmangtemji temeket state tem (Assam, Manipur, Arunachal state) ajak dang nungi tajungba asütsüla” ta jembir inyak asübo tanü Naga nungertemi gari lenmang majungba indang kangabo menemnemla. Mapang shia Centre nungi lenmang yanglutsü atema sen crore-sa crore yoker, saka timi mamshir. Yakünü osangkaket nung “Nagaland sorkar kübok PWD department-i lenmang meyanglu ser sen crore 20 agizüka agiogo” ta ACAUT teloki metetdaktsübaji nüburtem atema tejashitsü osang ka asütsü. Gari lenmang mejungi yanglubajibo toktsür sen agizüker mapabo khenyongi meinyakbajibo nüburtem kanga mezüngmeshiba mapa ka asütsü. ‘Gari lenmang yabo ajak meyong lir’ ta tangatetba nung UP nung inyakba amaji asen state nunga lenmang kong yangludir iba tesem nung aliba lenirtemi mesüra yim sasep nunga koba lushi nung südir iba yimten jagi nübo indok mesasai nüka yangludaktsütsüla; nüngdakra video-a tangoktsüla.