Lenmang nung gari masemer

Joko Nagaland nung Kohima aser Dimapur nung dang masü saka tanga town aser yimtsüng nung dena lenmang nung gari masem kümogo. Iba jagi mapa aika metemtet anogo süir, kechiyong lenmang nung gari tsüktepa yur tadongtsüka mapang shitak nung matonger. Shitakba agibo gari ya tetsüng dang nungibo tekaraba jajar asünungji yakta atongtsü aser mapa yakta atemtsü asoshi yanglu aser yamaji mapang tatsüba agia mapa tuluba renemtet. Ajisüaka, tanübo town nung senzüdangbo gari dang nungi tetsüngang tekaraba kümogo. Ibaji meteta joko aikati town tiyongibo gari bener maiter mesüra tamasayongi gari bener mayazüker. Iba ama gari onsaraba agi lenmang nung moutet tim atemba mapang ya lanurtemi iba tebilemtsü ya kodaser koktettsü ta bilemdangtsüla. Iba amaji tanü nübortemi ajuruba timtem koktettsü lenmang bushia agütsütsü asoshi kaketshisatsü bushitsüla. Atangji, tanü lenmang nung gari mesemi jajaba timtemji lenmangbo ulushia meyanglur saka garibo teimba teimba akümer ta asüba ajanga lir. Ano, iba denji lenmang ilaba dang masü saka lenmang nung tapok onsara, anungji aji paidoktsü merangdang lenmang tilakaji tilaba kümdaktsür. Iba denji, ano gari anishirtemia gari senzütsü lateta yutsüba inyakyim kecha mebenshir saka tama aotsü raktepaa mashi-mashi anir aser pei anennüdak mashimashi anenba ajanga gari anabo ayongayonga süiteptettsüba agi gari kata ajanga moutettsüsa akümer. Atangji, yimti tiyong nung gari taor aser tarur ajak timi tarensena ooya aliyonga kodamasüba lendong nung senzür Fire brigade aser Ambulance nungertembo gari ajak ajazüka aotsübaji tim aser gari ajaki parnok nemji lenmang aitsütsüla, kechiyong parnokji taküm aser rongsen kümzüktsü asoshi arsangokja senzürtem lir. Ajisüaka, Naga nungerbo MLA kümrabang, kecha nübortem timatemba hau ta mali, par atemabo traffic rule-a mali amato tangar gari taolen mali nungtepa alidak arua anioktsü. Aji oda, ministertemi nübortem gari nung senzüa alibatem ajak tenük amur ajazükyonga aoba agi timtem agütsübabo jembitsüla masü. Parnok asoshibo tarok tapa kecha mali odang yimdanga dang aotsü, idangji nübortembo anogo ka menutsü. Itemji dang masü saka Nagaland nung lokti aser yimten tentet aika lir aser item lenirtem shia gari nungji ‘President’ ‘Chairman’, ‘Convenor’, ‘Secretary’ ta asüba tenüng zülua maloker, lenmang nungjia pa-ang senzür ama, nisung ajak alemdanga oa jajaba angutsü. Lenmang tila aser gari aika asüba agi karaa moutet kangshia alinung ano item ama tulurtemi yimya awashi memetet tom-tom nung tsüdanga-tsüdanga aoba agi nübortem timtem  talila ajurur. Nagaland nung koba town südir süang, town akümertemi tarutsü nung kenü anogobo lenmang nung gari masem senzütsü ta nüklai arua lenmang asazüka mayu aser ayuyonga ali kiburtemi atsüngsep. Iba jagi tanü town tiyong nung gari anendaka maka aser gari ana ta junga mesüitepteter ta kangshiba angutsü. Asenok nübortem dak aketba tezüdangtsü kaji, asenoki asen kima ajanga gari sademsadema aotsüsa lenmang magütsüner. Iba jagi asen kima asen kidangi arurtema gari tanendak maka aser kimaji anena yudi asünunga tangar gari ajanga mesüitettsü ta asüba timtem ajurutsüsa asenoki asenoksasa morumorua yanglur. Town nung balaka ali kiburtemi ki yangludang, gari lenmang sademsadema yutsür külenang ano asen kima gari sademsadema anentettsüsa tawa peria yutsütsüla. Iba ama gari anentettsüsa tesem tesadem alidakang dokan nungang teimba yoktettsü. Koba town mesüra koba yimtak alir südirsüaka, ibaji asen town aser asen yim, anungji yimdonga sademsadema ayutsüla aser asen temeketa merükmerüka ayutsüla. Atangji, lenmang ulushia yanglutettsüba nung akok tashi ulushia yanglutsü aser ulushia meyanglushitettsüba nung azüklen apu atemtsü Item ajak nungji nübortemi angateta anidaktsüla aser tulurtemia pei agitsü bilema masü saka tangar tsüngdanga asen lima topur junger ta asütsüsa yanglutsü bilema inyaktsü junger.