Lenmang shibai yanglutsü

Nagaland nung lenmang majung ayutsü tokteper amai National Highway-ang tamajungba aser State Highway-ang tamajungba ta tesem aika nung log abenba gari jajaba lenmang amai kümogo. Iba tia nung lenmang repranger mali yamaisa ao nungbo taküm mei mapang arudangbo lenmang aika nung gari senzü majungtsü. Atangji, gari lenmang majungyonga tesem aika tonga oagi tangbo helicopter-a senzüteter, anungji timtem lendong aser rongdak nüngdak adokba mapangbo tayimtsü nungji senzür. Ajisüaka, alilen gari lenmang majung tashi aser train junga mesenzü tashi nübortem nüngdakbo kodanga meperitettsü. Ibayongji, Nagaland nung ya tangsa tang temulung agüja inyaktsüba mapaji gari lenmang ajak tasazük shitak kanga junga yanglutsüla aser akok tashi Naga lima ajaklen train senzüdaktsütsüla. Idangji dang asenok kecha tetsükdaktsü makai aser takoksa melii asen lima nung ngutetba, züsentetba aser yangluba rongsentem ajak tajung dang meraksadang tangaleni yoktettsü. Aji oda, gari lenmang junga ayutsü nüngdakba ya gari meraksai aser nisungtem timmedemi senzütsüba dang masü saka gari lenmang ajung nung dang nübortem inyaktsü mapa aser temoatsü ka khen, ka khen ta arutsü. Akhidang, khenbo PWD purtemi yangluba lenmang majungyonga Border Road Organisation purtemi yangluba lenmangbo kanga junga liasü. Ajisüaka, tangbo BRO-temi Nagaland nungbo ali nangdena yur yangji bitumen tatsük meküplokja lenmang yanglutsüba tashi lanurtemi putetogo. Aji oda, joko Nagaland nungbo NH aser SH ajak nung kilentzü lapokja aser lenka aser lürlen arem chidoka inyaktsü pur labour-tem to kata mali kümogo. Iba jagi lenmang tiyong nung motzü ayimer aser arem agi lenmang mangu nembanga lir. Iba ama tebilemtsü koktettsü asoshi department nem dang nungloka metoktsüi, parnokji mena yur, nübortemi jembitsüla aser takoktsü lenmang sayutsüla. Aji oda, Nagaland nung lenmang junga yunüra, atangji yimten tebilemtsü tama koktettsüla ta ashibaji shitak, anungji koktettsüla, ajisüaka Naga nunger asoshi telemtetba agi atadang Nagaland menendoktsüsa akümtsü. Ibaji asenok ajak asoshi khuret tulu asütsü. India nunga India nungertemi yimten nüjiso bushiba mapang nung train aser gari lenmangbo jungjunga anepalua inyak, iba jagi tanü tashi India nung nisung senzüba aser khu abenba gari aser train ajak sademsadema senzütettsüsa lenmang tajungba tajungba yanglur aser repranga anepalur. Ibaji teimbaka government o private na (PPP) tangatettep nung inyaker. Iba jagi, taoba hopta nung, “Nagaland nung National aser State Highway lenmangtem ya PWD-i masü saka private company-tem nem reprangdaktsü nunga koma süla ?” ta asüba nung asenok aikati shilem agia bilemdangogo. Atangji, aikati junger ta langzüogo aser aji atangji junger. Ajisüaka, tasüngdangba kaji gari lenmang-tem ajak ya private party nem yangludaktsü nungbo tang PWD nung inyakertem kongi aotsü ta asüba tasüngdangba aser tebilemtsü indanga jembiogo. Ajisüaka, PWD nung inyakertem mechi lenmang raksayonga terepranger mali odang toktsütsübaji mapa masü.  Aji oda, Nagaland nung lenmang ajunga private nem agüjadoktsü mechi tang PWD nung inyakertem temulunger tashi, sentong tajung yanglur, government mapa nungi anentsüa (Voluntary retirement) akok mesüra parnokji private party purtemi inyakba mapa nunga kasa ita sen chia inyaktsü akoktsü. Iba amajika masü nungbo, PWD aser BRO na yagibo lenmang junga yanglutsü aser reprangtsübo makoktsü. Iba tebilemtsü yagi asenoki Nagaland nung lenmang tesadem aser tajung yutettsüsa shisatsü bendena inyaktsü mapang tongogo.