Lenmang yangluba reprangtsü asoshi Court Commissioner shim

New Delhi, May 19 (NEPS) : Yangi New Delhi nung Brehostibar nü Nagaland nung gari lenmangtem yanglutor aliba repranga yangludaktsütsü asoshi National Highways & Mechanical minister, Nagaland, Wb. Nuklutoshi-i Court Commissioner Office lapoktsüogo. Court Commissioner ya taoba obendanger Justice R.B Mishra asütsü shimtet.
Tang ya Nagaland nung district pongo nung gari lenmang yanglutor lir aser item lenmangtem meyanglui toktsüba anema okadak ken o agütsüba angadanger May 13, 2016 nü Gauhati High Court ajanga lenmangtemji repranga yanglutsü asoshi Justice R.B.Mishra Court Commisionser asütsü shimtet.
Tang yanglutor aliba lenmangtemji (i) Mon-Tamlu-Merangkong, (ii) Longleng-Changtongya, (iii) Phek-Pfutsero, aser (iv) Chakhabama-Zunheboto nungertem lir. Item lenmangtem ya SARDP-NE sentong kübok yanglutsü asoshi M/S IL&FS (Maytas – Gayatris (JV) telok nem agüja liasü. Item lenmangtemji ochishia jungjunga yanglutsü asoshi MoRTH, PWD(NH), Nagaland aser Contractors M/S IL&FS teloktem dang obendangertemi ozüng agütsüogo aser item mapatem renemtsü asoshi ita terti mapang latettsüogo.
Tanü Court Commissioner Office lapokja jembidang, Nuklutoshi-i ashiba agi, tamalen obendangdak nungi item mapatem ya tenzüka inyaktsü asoshi shiaka, maparen kar nung timtem aliba agi mapa inyakertem nem tagütsütsü aliba sen magütsütet aser aser mapa tenzüka aotsü asoshia senotsü melemzüktsütet.
Tang merenemteti aliba lenmangtemji district pongo aliba nübortem asoshi tongtibang lenmangtem lir saka mapang shitak nung merenemtsütetba ajanga lokti tentettemi aiben longkak aita parnok timatemba metetdaktsü aser kari okadak ken o agütsü. Iba ama atalokba ajanga nübortem asoshi temoatsü asütsü asoshi inyakba mapa agi mapang talangka timtema aru ta Wb.Nuklutoshi-isa tesasaba ken o ka metetdaktsü.
Iba sentong nungsa Court Commisisoner, Justice RB Mishra-i jembidang, obendangdak nungi agütsüba obendang nükjidongji nübortem asoshi mapa shitak inyakdaktsütsü tangatetba nung agütsüba asünungji, yaktasa mapa inyaktsü purtem ajak nungi osang agitepa mapa tenzüktsü ta metetdaktsü.
Iba kasa sentong nung Temsu Soya, Legal Officer (Nodal), Works & Housing Department, VN Narayanan, Assistant Resident commissioner, Nagaland House, New Delhi aser Nagaland PWD (NH) nung ketdangpurtem dena liasü.