Lennir tajung shimtsü atema sen amshiba sobaliba agientsüla: Khandu

Kohima, December 5 (TYO): Arunachal Pradesh Chief Minister, Pema Khandu-i tanü elections nung sen amshiba sobaliba agiener nübo tajungtem shimtettsü aser parnok nem pei pei state aser North East tesem tekjakleni anir odakjang ta tayongzükba agütsü.
Arishi küm 38 tain Pema Khandu ya North East nung chief minister inyakertem rongnung tanubosang lir aser pai Hornbill benjung nung o jembidang iba tayongzükba agütsü.
“Nagaland aser Arunachal Pradesh state tem nung yimten telok aika lir aser iba jagi candidate aser nübortem tsüngda maparen balala inyaker. Asenoki election mapang sen aika endoker aser amshir saka ibaji tim masü,” ta Khandu-i ashi.
“Mapang melenshiba den külemi asenoka melenshitsüla. Tawa Nagaland sorkar aser arogotem külemi taruba election nung sen mamshitsü tenangzükba agia sangdongba pelaa agizüker. Asenoki sen amshiba sobaliba agientsüla kechiyong election nung iba sobaliba benshira, asenoki lennir tajungtem meshimtettsü. Asenoki lennir tajung meshimra, state nung kodaser terenlok alitsü?” ta paisa shisem.
“Asenoki sen mamshitsü nangzüktsüla aser talisa lanurtemi sen amshiba sobaliba ya agientsüla. Taruba election nungbo telok aser arogotemi public dang iba tangatetba agizüktsü aser sen amshiba sobaliba toktsütsü atema tayongzükba agüjang” ta Arunachal Pradesh chief minister-isa ayongzük.
North East Region nung tagitsü aser sempet aika lir aser asenoki itemji timi amshira tajangzük tulu angutsü. Anungji NE state shiai Development aser Investors summit tem ayonga agitsüla, ta paisa ashi.
Tesüiba küm aika North east tesem senzüka toktsü saka tang Prime Minister Narendra Modi lenisüba kübok north east renloktsü atema mapa jenti inyaker. PM Modi-i New India Vision yimyim agütsüba nung 2022 nung India nüjiso ngur küm 75 buba amungtsü aser iba asoshi India tasen ka yangertsü atema alizüng yur mapa inyakba nung north east kübok state shiai mapa inyaka arudar, ta Khandu-isa metetdaktsü.
Nagaland sorkari Hornbill benjung ajanga tangar dang state sayuba dang masü saka North East tesem ajunga sayuba atema tenüngsang agütsür. Iba benjung ajanga India tongtiba nung alirtemi North East indang osang tejangjaba metettsü kechiyong parnoki north east ji state ka, kin ka, chiyungtsü ka ama bilemer saka parnoki bilemba dang nungi khenyongi balaka lir, ta Arunachal Chief Minister-isa ashi.
“Nagaland sorkari Arunachal Pradesh state indang ozü (Hornbill) tali nüngtugü kümdaktsüba atema kanga pelar. Nagaland-i Hornbill benjung nung sen aika aazüker anungji Arunachal-ia Nagaland dang nungi taa meshitsüla” ta Pema Khandu-isa asayamenüa ashi.