Lennir tajungtem shimangma

13 buba Nagaland Legislative Election nung züngsem akümtsü atema parnok tetokteper ajak agi nisung 195 lir. Constituency balala nungi candidate temi assembly menden 60 nung takok angutsü atema merangteper. Asenoki taküm election nung candidate temji reprangdangra, parnok aika temeyoktep lir aser tejenpurtem aika den tejak tasentem-a aika dena lir. Tang teinyakdak MLA tem, yimsüsür tejentem aser taoba election nung toktepa arurtem dak alia tang tejak tasen angurtemji taoba mapang sorkar ketdangsüba menden nung tongti ketdangser inyakertem aser lokti o tentet balala nung tanishirtem dena lir. Candidate ajakji tajung dang aser parnok temsüa aliba agi dang election nung tokteptsü asoshi tenüng agütsüba agizükogo. Joko parnok rongnungi asen state lennitsüpur shimtsüba mapa dang anünga lir aser ibaji asenoki inyaktsü. Anungji, asenoki parnok rongnungi ka shima vote magütsüdang tamasa asen lennitsüpurtemji jungjunga metettsü merangtsüla. Mezüngbuba nung tang teinyakdak yimsüsürtemji sorkar ketdangsübaren nung aika ajangshia arurtem lir aser parnoki kümsük ka tashi sorkar menden nung mener inyaka aru asünung, parnoki state ketdangsübaren kanga junga meteta lir aser parnok tanaben shim nunga ajungtsü. Ajisüaka, tamasa asenoki parnoki inyaka arubatem khen meyipa reprangdangtsü tim. Taoba election nung parnoki inyaktsü ta nangzükbatem mapa küma inyak asü masü? Parnoki jembiba ama mapa agia inyaka sayu mesayu? Pa ajanga constituency /state nung terenlok mapa inyaker asü masü? ta asüba tasüngdangbatem atema asenoki telangzübatem bushitsüla. Tanabuba nung taoba election nung toktepertemi tang-a kechi tangatetba nung tokteper ta asüba kuli asenoki metettsü tim. Atangji, pa/lai constituency aser state atema mapa tajung inyaktsütsü mulungtetba nung noktaker maneni tokteper asü mesüra menden aser rongsen arshia tokteperba dang ta asenoki parnok indang tangatetba metettsüla. Tasembuba nung taoba mapang sorkar ketdangser inyaka arurtemjia kechi tangatetba nung election nung tokteper ta asenoki telangzüba bushitsüla. Nagaland nung sorkar ketdangsertemi election nung toktepbaji yimya ka ama dang kümogo aser election agi shia asenoki ketdangsertem aika toktepa aruba nguogo. Ketdangser aikati mapa tajung teinyakdak nunga sodi agir election nungsa toktepa arur aser kari mapa inyakba kümsük tembanger ketdangsüba menden toktsüba sülen ano asentenshir election nungsa tokteper. Nübortemi parnok kechi tangatetba nung election nung tokteper’ar metettsüla. Sorkar ketdangsübaren nung temelenshi bener arutsü atema parnoki election nung tokteptsü mulungteter noktaker asü mesüra tanga tebilemba nungang ajemdaker tokteper ta asüba kuliji asenoki bushitsüla. Tatemsa, lokti aser tentet balala nung tanishir süa arurtemi election nung tokteptsü mulungtetbaji kechi tangatetba nung ta asenoki jungjunga metettsü tim. Parnoki lokti len ania arudang kechi koma inyak, ochishia inyak asü, parnok dak sorkar ketdangsütsü sempet lir mali, ta asüba kulitem asenoki metettsüla. Nagaland yanglushitsü mapangji tang ya lir aser tanü asenoki meyanglura tarutsü tiaji ayatai asütsü. Anungji 13 buba Nagaland Legislative Assembly ketdangsüa aotsüpurtem asenoki kanga dang shisa kaa shimdi. Tarutsü nung asenoki menemnemtsüsa lennir tajungtem shimtetdi. Ajak dang tematibaji Clean Election tangatetba nung asenoki iba election nung shilem agidi aser sorkar tajung ka kümtetdaktsür Nagaland tejakleni anir odaktsüdi arungma.