Leonardo DiCaprio shiruru tasümang den mejang

October 24, 2015: Leonardo Dicaprio-i, tang tangokba ‘The Revenant’ film nung shilem agiba mapang shiruru tasümang den mejang aser jang shi tazü achi, ta sapoka shiogo.
Alejandro G. Iñárritu- direct asüba iba Western film nung DiCaprio-i Hugh Glass ama shilem agia lir. Film nung parnok telok ka külemi shikari dang pa shirem kati kanga mejungi yirutsüba sülen külem telok puri par jabaso tepeter aser pa-a tasütsü asoshi toktsür oadoker.
Yahoo Movies den jembiba mapang DiCaprio-i, “Film nung shilem agidang jilo tasak ajangshiba 30 mesüra 40 shi ni shitettsü. Ayong nung tzü rüjeb kümer aliba nung mapang tera talanglang jaja, shiruru tasümang den külemi ayip aser kodanga mechidangba chyungtsü aika chidangogo,” ta ashi.
“Ni kodanga jang temesen tazü mechidang aser machir. Nenoki iba film reprangdang ni shi achiba yimya angutsü kechiba süra director, Alejandro González Iñárritu-i ibaji telung nung enoktsür liasü,” ta Di Caprio-i ashi.
Arishi küm 40 tain, DiCaprio-i, “Tanü asüng film rongnung iba film ya balaka asütsü. Film otsü nungji teimla makai alisang nem alimai (nature) teimla aser temelenshi agütsü. Ibaji ajanga pa taküm kanga melenshitsü,” ta shisem.
Ajakji toktsür DiCaprio-i Star Wars film tarensen tasenba ‘The Force Awakens’ kanga jangratema bilemer.
‘The Force Awakens’ ya ‘The Revenant’ film sayatsü hopta ishika dang lia saya aser box office nung Star Wars film den tokteptsüji kanga tasak ta DiCaprio-ia meteta lir.
“Ni Star Wars den tokteptettsü ta kodanga mebilem. Ajisüaka kodang nuburtem ‘The Revenant’ film indang angashidir parnoki reprangdangnütsü aser aji onok teimla,” ta pai ashi.
Iba film ya January 8, 2016 nü US aser January 15, 2016 nü UK nung sayatsü sentong lir.