Leonardo-i design asüba teptsü ka Tom Hardy-i atep

Los Angeles, Tsüklai 2 (Agencies): Leonardo DiCaprio den bet asayaba makokba sülen küm ana lir Actor Tom Hardy teka nung “Leo knows all” ta sür teptsü (tattoo) ka tepogo. Iba teptsü ya Leo-i design asüba lir.
Hardy shibai taküm Oscar nung züngoksema aliba film ‘Dunkirk’ nung shilem agir, pai ashiba agi, pa teptsü ateptsüba küm ana tashi thia aruogo kechiyong DiCaprio indang handwriting kanga majung, ta thesun.co.uk-i metetdaktsü.
Actor anaprongla ya 2015 küm yangluba film ‘The Revenant’ nung shilem agia liasü aser iba mapang nung DiCaprio-i Hardy dang pa iba film nung shilem agiba atema Oscar nung nominat asütsü ta shia liasü, ajisüaka Hardy-i iba o ya magizük. Iba sülen tena bet asaya, aser iba bet nung shibai mekoklir pai takokeri mulungba teptsü ka ateptsü ta telemtetba agia liasü.
Iba sülen 2016 küm Best Supporting Actor jenjang nung Hardy nominate asü, aser pai bet makok.
Hardy-i iba dak sendakba nung mapang tatsüka kecha meshi aruogo, ajisüaka fan ka den selfi agidang iba teptsü ya jungkai adok.
2015 küm Oscars sülen Hardy-i ashiba agi, pai iba teptsü ya matep kechiyong DiCaprio indang handwriting kangasa majung.
“Pai khenyongi handwriting tamajung nung ‘Leo knows everything’ ya zülur agütsü. Iba sülen ni pa dang teptsüji tetepbo ateptsü saka zülushir kua ta ashi,” ta Hardy-i ashi.
Taküm Academy Awards 2018 nomination list nung Hardy dena züngoksema lir. Oscars sentong Star Movies aser Star Movies Select HD nung Metsüremi (March) 5 nü sayutsü.