Leonardo o Kendall Jenner nati ‘Vote Your Future’ video sayaogo

October 05, 2016: America Tir election jelia nüngtugu celebrity temi ‘Vote Your Future’ campaign tenzükogo, aser iba video nung Kendall Jenner aser Leonardo Dicaprio na densema nüngtugu celebrity temi nüburtem dang vote atema tenüng züluoka linük yimsüsütsü atema lenir shima vote agüjang, ta ayongzüka lir.
Iba video tetenzük nung celebrity temi ‘What do you care about?’ ta asüngdanga onük balala nung jembia lir. Item onük rongnung anema aliba shisatsü, nisung tebendang maliba, alima tzümopung melenshiba, mopung menenba, tashiyim amshiba, tetsürtem anema inyakba aser raraba osettem densema lir.
Parnokisa, vote agütsütsü atema tenüng mezüluoki alirtem dang tenüng züluoktsü ajungshia lir.
Leonardo aser Jenner na dak alia tanga celebrity rongnung Olivia Wilde, Robert De Niro, Kathy Griffin, Julia Roberts, Rami Malek, Bella Thorne, Anne Hathaway, Jonah Hill, Emma Stone, Ken Jeong, Zendaya aser Edward Norton nunger lir.
Leonardo DiCaprio-ia tawa pai Washington, D.C. nung US Tir, Barack Obama den alima tzümopung melenshiba tebilemtsü onük jembiba indang lemsatepa lir.
Moby-ia America nung raraba osettem azüoktsü indang jembia lir.
Kasa video nung Wilmer Valderrama-i immigration onük aser Donald Faison-i nisung bendanga amshiba onük jembia lir.
Kendall Jenner-i, ‘Na kidang dang mener nai vote magütsüra, nai tajung kecha meinyaker; nai tensa raksatsür,” ta ashi.
Ano Samuel L. Jackson-ia, ‘Nai vote magütsüra, na o jembitsü temeten mali,” ta jembia lir.