Leonardo o Steven Spielberg nati ano project tasen ka inyaktsüa akok

Monupii/May 18, 2018: ‘Lincoln’ film tasenba yanglutsü atema sentong atongdar aser iba film nungji Leornado DiCaprio-i tongti shilem agitsüa akok, ta osang angazüker.
Film yanglur, Steven Spielberg-i Oscar award anguba drama Lincoln film ano ka yanglutsü bilemdar, ajisüaka tanbo iba film otsüji Civil War general Ulysses S. Grant indang asütsü, aser iba shilemji Leonardo Dicaprio nem agidaktsütsü atema jembidar.
2002 küm Catch Me If You Can film nung Leonardo aser Steven Spielberg nati külemi inyaka liasü, aser maneni film tasenba atema Spielberg-i DiCaprio den jembidar, ta The Hollywood Reporter osang ajanga metetdaktsü.
Iba film tasenba otsüji, 1861 küm Abraham Lincoln tepsetba sülen küm ishika lir Civil War general-i Tir benzükba indang lir. Iba film ya Ron Chernow indang taküm otsü ‘Grant’ nung ajemdaker yanglutsü. Lincoln film bo Doris Kearns Goodwin indang kaket ‘Team of Rivals’ nung ajemdaker yanglua liasü.
Arishi küm 43, DiCaprio-i iba film nungji shilem agitsü asü magitsüar tang tashi nungbo mejangjar, kechiyong tang Spielberg aser DiCaprio naprong project balala nung kanga mazüngi lir.
Arishi küm 71, Spielberg-i tawa Ready Player One film sayaa liasü aser tang Indiana Jones 5, DC Comics’ Blackhawk aser West Side Story project nung mazüngi lir.
Oscar award angur, DiCaprio-ia Quentin Tarantino den külemi film ka atema inyakdar.