Leone Hostel Phase-II aser tawa yanglushiba Basketball Court semzük

Kohima, November 11 (TYO): University Grants Commission (UGC) Scheme 2015-2017 fund nungi anaben amentepa yangluba Leone (Girl) Hostel Phase-II tanü Kohima Science College Jotsoma (KSCJ) nung semzükogo, iba den külemi Basketball court yanglushiba semzüka liasü.
Leone (Girl) Hostel Phase-II nung kaketshir 37 litettsü aser iba ya sen lakh 70 indoka yanglu. Iba hostel ya tanü taoba mapang KSCJ Principal aser tang Additional Director of Higher Education teinyakdak, Dr. I. Anungla Aier-i semzükja liasü.
Iba jakdang laisa tawa yanglushiba basketball court-a semzükja liasü. Tang tasen yangluba hostel nungi metre 20 shi pilar aliba basketball court ya KSCJ Alumni 1996 passed out batch purtemi sen lakh 4.5 indoka yanglushitsü.
Sentong nungsa Women Hostel Construction committee nungi Dr. Limatemjem-i committee osang metetdaktsü aser Alumni 1996 passed out batch nungi Jio Centre Manager, Kohima, Moatemsu-i basketball court osang metetdakja liasü.
Sentong nung KSCJ EU Tir, Sehuto Kezo-i Tsüngrem leniba meshia sarasadem, KSJC Principal, Dr. Lily Sema-i onük tatsüka jembi aser Campus Christian Fellowship (CCF) Chairman, Er. Khoto Zetsuvi-i meshiteta sarasademtsü.