LeT-i Delhi amaktsü asameyangdar

New Delhi, Dec. 05 (Agencies): Kiralongrar telok Lashkar-e-Toiba (LeT)-i peisasa taküm tenla agüja kanga tongtibang nisungtem dak tenük yoka linük yimtiba, Delhi amaktsü sentong yangludar, ta Delhi police-i benokba FIR ka ajanga osang jungkai adokogo.
Taküm tenla agüja Delhi amaktsü asameyanger LeT züngsem ana Delhi Police-i tang tebushidak lir. Mulung melemteti aliba LeT züngsem ana- Dujana aser Ukasha na Pakistan occupied Kashmir (PoK) ajanga Jammu and Kashmir telungi aitba osang Intelligence osang ajanga Delhi Police, Special Cell nem metetdaktsüba sülen FIR ka benok, ta police osang ka ajanga ashi.
Dec. 01, 2015 nü yangi Lodhi Colony nung aliba Special Cell office nung IPC kübok Section 120 B aser Unlawful Activities (Prevention) Act tapet ozüngtem nung ajemdaker FIR ji benok, ajisüaka mulung melemi aliba tenüngtembo agüja mali.
LeT-i Delhi densema linük nung tesem kar amaktsü sentong yangludar, aser iba atemaji J&K aser tanga International arrtsütem adena parnok India telungi aitogo, ta police osang ajanga ashi.
Dujana aser Ukasha na mapang talangka nungi Kashmir Valley nung amenoker inyaker aser Delhi nung kanga tongtibang nisungtem dak tenük yoker tena sasa mesüra nisung kar ajanga taküm tenla agüja amaktsü sentong yanglur, ta kasa osang ajanga ashi.
LeT züngsemtemi ‘code’ tenüng Noman, Zaid mesüra Khursheed ama amshidar. Parnokisa yimti nung nisung longsoa alitak amaktsü akok, ta kasa osang ajangasa shisem.
Delhi police-i FIR benokba sülen tongti ketdangsertemi Special Cell dang LeT pusemertem osang bendentsü, technical surveillance agitsü aser tekaraba nung parnokji aputsü atema inyakang ta tuyuogo.