LeT tanishir Saeed-i JNU sentong nung yaritep: Rajnath

New Delhi, February 14 (Agencies) : Jawaharlal Nehru University (JNU) nung lungkak aitba sentong nung Lashkar-e-Toiba tanishir Hafiz Saeed-i teyari agütsü ta Home Minister Rajnath Singh-i osang metetdaktsüba pusema, Deobarnü Home Ministry otongdar katia ‘security agencies’ balala nungi angazükba osangtem sülen Rajnath-i iba olen jembi ta ashi.
“Telok balala nungi osang sangoktsüba nung ajemdaker Home Minister-i iba olen jembiogo” ta Home Ministry otongdari ashi.
Parliament amakba atema aitsür Afzal Guru alensetba anema Delhi nung aliba JNU campus nung sentong ka ayongzüka agiba nung Saeed-i teyari agütsü, ta Deobarnü Allahabad nung sentong ka nung jembidang, Home Minister Rajnath-i ashi.
Iba onük atema opposition party balala Rajnath dang nungi kuli meshitsü tenzük aser yimtenren ken o tuluka ka kümogo.
Jawaharlal Nehru University nung ayongzüka agiba sentong nung Pakistan nung amenoka aliba Lashkar-e-Toiba (LeT) tanishir Saeed-i teyari agütsü aser ibaji linüki angatettsüla, ta Rajnath-i ashi.
JNU nung kaketshir kari Parliament amakba atema aitsür Afzal Guru aser Jammu Kashmir Liberation Front co-founder Maqbool Bhat na alensetba asoshi mang ayimba sentong ka ayongzüka agi. Iba dak sendakba nung police-i students’ union president Kanhaiya Kumar apu.
Brihostibarnü Delhi Police-i linük anema inyakba ken o ka benok aser Kanhaiya Kumar apu.