LFM, Dimapur nung Children’s Day amung

Dimapur, Nov. 14 (TYO): Little Flower Montessori pur tsüraburtem den külemi November 14, 2017 nü Children’s Day ayongzüka mungogo.
Sentong nung tanurtemi action ken, tsüngsang aser temulung agi lai tekongtem azüngba nung shilem agi.
Maneni tsüraburtemi tanurtem atema bendanga agüja sarasademtsü aser Mrs. Limalai tembang.
O tatsütsü jembirtem rongnung Mrs. Setusa Nguori-i tanurtem anepaluba atema school ketdangsertem tenüng asangba den külemi tsüraburtem dang tarutsü atema pei chirnurtem anepalutsü asoshi ajungshi.
Sentong nungsa ano Mrs. Toholi R. Chishi-ia school ketdangsertem dang tasü itta school ajungkettsüba (upgrade) atema ajungshiba den tsüraburtem dang pei tanur sayutsü asoshi mapang indoktsü atema ajungshi.
School Administrator Mrs. Aienla-i, tanurtem kaket shisatsü angazüktsüba aser parnok tekolok aser tsüraburtemi shisa kaa, ochi nung tanurtem anitettsüba dak sendakba nung tongtipang onük ka benoka jembi.
Tsüraburtem yimyaji tanugtem lenmang nung milen ka ama lir, tsüraburtem shisa kaa lira tanurtem iba tsüngsü nung anidaktsü, ta laisa ashi. Iba sentong lokti ajaki sarasadema tembang.