LGBI Airport nung Coronavirus screening counter amenokogo

Guwahati, January 31 (Agencies): India nung Coronavirus ajanga nisungtem shiranger ta osangtem prokshiba nung ajemdaker Airport Authority of India (AAI)-i Assam sorkar den yaritepa Lokapriya Gopinath Bordoloi International (LGBI) Airport, Guwahati nung screening counter ka amenokogo.
Centre-i latettsüba Standard Operating Procedures (SOP) nung ajemdaker Northeast tesem balalai aoba passenger tem reprangtsü atema check-in screening counter amenok, ta AAI ketdangser kati ashi.
Tang tashi nung Coronavirus aketba nisung shinga meputet. LGBI Airport nung Singapore aser Bhutan nungi nisung aruogo. Anungji onoki specialized centre ka amenoka lir, ta paisa ashi.
“Centre sorkari latettsüba SOP kübok onoki inyaker aser nisung kar dak virus aliba putetra, GMCH nung aliba isolated ward-i anir aotsü” ta ketdangserisa shisem.
Paisa ashiba agi, “tayimtsü ajak dang screening counter lapoka aliba indang osang metetdaktsütsü aser nisung kari dang temang nung timtemba atema tebilemtsü lira, Guwahati airport nung aliba screening counter nung tendangtsü tetuyuba agütsüogo.”