Lhoubeilatuo Kire den tepila sentong agiogo

Dimapur, Chiteni/July 1 (TYO): Department of Under-Developed Areas (DUDA)-i, Lhoubeilatuo Kire IFS, Additional Chief Secretary to the Chief Minister, DUDA, Forests, Environment & Climate Change aser PCCF &HoFF den tepila sentong agiogo, shiba June 30 nü sorkar tenzükba mapa nungi anenogo. Pai 2014 küm nungi DUDA bener liasü.
Lenir kanga dang tongmelang asüba ajanga pai Department dang iba amala sentong ayongzüka magitsü asoshi shia liasü. Tepila sentong nung pai, DUDA nung pa kübok inyaker staff aser officer ajak dang kanga pelaba lemsatep. Pai, DUDA nung pa indang tenure ya ajak dang temulungsüa inyakba aser tangazükba akaba mapang ka liasü ta ashi. Nagaland anüdoklen kinük nung aliba tesemtem semdangtsü asoshi maongka angu ta shia, ACS-i ashiba agi, Nagaland anüdoklen alirtem temulung kanga tulu, kanga mulungso, shisa taka aser temeim taochi agi sünga lir, ta ashi. Paisa, item tesemtem ya infrastructure tsütsü terenlok agi tangar memenepaka, nüburtem ya Naga kin aika dang nungi tebilemdangba nung tejakdang lir, ta ashi. Kire-i ashiba agi, Department kübok tenzükertemi bendanga agüja inyakba ajanga 2003 küm nungi tenzüka iba Department kanga tejakleni odar. Paisa, department ya nübu tajung kübok lir ta ashi.
Kasa mapang nung Advisor DUDA Bongkhao Konyak-ia, L. Kire dang kanga pelaba lemsatep, shiba pai ashiba agi, anüdoklen aliba Naga nunger ka ama lir aser iba tesem nung aliba Naga nungertemi pa kanga meimer aser akhümtsübur, ta ashi. Bongkhao-isa, Department aser anüdoklen aliba Naga nungertem ajungkettsüba asoshi pa nem tenüngsang agütsü. Kire-i maneni tarutsü nunga parnok len anitsü imlaa ataba pai lemsatepa liasü.
Sentong nungsa Secretary & Director DUDA, K.S. Anden Konyak-i, L. Kire ya AHOD dang masü saka tembar, tanüker aser ajungmesor ka liasü ta ashi. Paisa, Keri-i bendanga agüja inyakba atema tenüngsang agütsü, shibai Department nung maparen tasen aika benoka inyakogo. Temetettsü kaji Keri-i achaayaga Minimum Support price (MSP) for Minor Forest Produce (MFP) under Tribal Cooperative Marketing Development Federation of India (TRIFED), Ministry of Tribal Affairs, Government of India amala scheme tasen State-i bener aru aser DUDA-i benoka inyak, aser iba ajanga anüdoklen aliba Naga nunger 11,400 ajangzükogo. ANGHYA amenokba nung L.Kire-i tongti shilem agiogo, aser iba ajanga Nagaland anüdoklen aliba aluyimertem shishilembadak balala den sendaktepogo, ta ashi.
DUDA officers aser staff temi mapa nungi anenba ACS dang kanga pelaba lemsatep den Keri ya mapang shidak amshiba, kanga tetangshi aser tesangra lenir ka liasü aser pa dak asayamenü yimya tajung keta liasü, ta ashi. L. Kire lenisüba kübok DUDA ya Team DUDA aküm. Pai lokti nung maongka peria manguba nüburtem asoshi nokdak aser akokba tashi teyari agütsüogo.
L. Kire, mapa nungi anenba mapang pai ACS to Chief Minister, DUDA, Forests, Environment & Climate Change den PCCF and HoFF mapa bena liasü. Pa ya bendanga agüja meranga inyakba nisung ka liasü. Pai tensa ajak nung tasü ita tetsübu melei inyak aser shinga bendanga mamshi inyakogo. Pa temeim, tenüngsang agi sünga aser DUDA officer aser staff tem ajaki nükshi mapa nungi anenogo. Department-i pa mapa tajung asoshi temulung ajak agi tenüngsang agütsür, ta K.S.Anden Konyak, Secretary GoN DUDA-i sangdong ka ajanga lemsatep.