Li-Ning den Srikanth tenangzüktepba ka yanglu

New Delhi, Aenjeti/January 14 (Agencies): India nunger nüngtugu badminton asayar Kidambi Srikanth-i küm pezü atema Chinese brand Li-Ning den sen crore 35 alang sports sponsorship deal ka Hombarnü yangluogo. Taoba world number one ya India nunger badminton asayar rongnungi Super Series 6 akoker pa kija lir. Srikanth tang premium Chinese sports brand Li-Ning den küm pezü atema tenangzüktepba ka yangluogo aser iba nung sponsorship aser equipment supply densema lir, ta osang ka ajanga metetdaktsü.
“India aser alima ajunga nung Li Ning ambassador asütsü shimba ya tetushi tulu lir. Ni parnok indang osettem kanga sapur aser tajungshiba tasen ka nung kü nükjidong metongteti aliba tem tongtettsü aser linük asoshi konang bener arutsütsü yongyaa atar,” ta Srikanth-i ashi.
Li-Ning puri China, Indonesia, Singapore aser Australia badminton team tem yaria arudar aser Jakarta nung 2018 Asian Games mapang Indian contingent official sponsor asü. Iba company ya 2020 Tokyo Olympics tashi Team India official apparel partner asütsü, kong India nunger rongnungi Olympic medal koktettsü imlar rongnung Srikanth ka asütsü.
“Srikanth ya alima nung asayar tajungtiba rongnung ka lir aser pa India nunger tebur badminton asayar rongnungi takok tajungtiba anguba asayar ka kümogo. Li Ning puri quality & consistency dak rangloker inyaker aser iba den Srikanth kanga tapet lir. Onoki tarutsü nung takok tajung nguyonga aotsü atema Srikanth nem teyari agütsüner,” ta India nung Li-Ning exclusive partner, Sunlight Sports Pte Ltd, Director, Mahender Kapoor-i ashi.