Liangmai kin Chaga Gadi bejung among

Kohima, October 31 (TYO): Zeliang nunger Liangmai kin Kohima nung alirtem October 31, 2015 nü I.G Stadium Kohima anasa aliba Highland park nung Chaga Gadi benjung amung.
Naga People Front (NPF) nung Tatong Tir, Namgangbi Chawang-i, tarutsü atema nükla tajung yur inyakyima aotsü aser alemli tetsü-tebu mapang ama tanga kintem den yimjung nung akhangjungshitepa alitsüla, ta benjung nung jembidang tesentepertem ajungshia liasü.
Pai, tesüiba mapangtem nungbo tesendaktep tajung aliba sayutsü meji Chaga Gadi benjung nung tanga kin jaoka külemi chiyungtepasa amung, ta shisem.
Paisa, Zeliang tsürtemi kinungboi kibong asoshi aayang tsüyangba mapang nungita yariba aser shilem tulu agiba asoshi tenüngsang aser tetushi agütsüba temaitsü chaga Gadi ya amunger, ta rateta ashi.
Tenüngsang agütsüba benjung ya küm piyong nung alu nungi temoatsü jenti anguba nüngtem nung amunger. Iba benjung nung tetsürtem nem tetushi tulu agütsür aser iba mapang teburi parnok den shi nung memetemtsü ozüng (Aliam) lir. Iba den külemi tetsürtem nem anisüngzük peria agütsüba den ano teburtem inyakyim nung takok jangzüka “Aliukuangkan” benjung mungtsür.
Liangmai welfare Society nungi tan Tongti Tezülur menden nungi anensang, Rutmakbo-i, Nagaland nung kin 16 rongnung züngoka aliba Zeliang kin ya Peren district lisopur lir aser Liangmai nunger ya sasapela den yimjung meimba kin ka lir. Parnok sobaliba kanga tashi tait aser takar, mongpu ajak nung benjung bentsü tapu balala amunger.
Liangmai Welfare Society Kohima-i, 2015 nungi 2018 tashi ketdangpur asütsü atema nübu shimogo. Tan shimertemji President  Namgangbi Chawang. Vice President Malumlung . Secretary Ratan  Kaurinta, Joint Secretary  Kawirangbo, Treasurer  Namty Newmai, Statistical  Secretary Samuel, Joint Statistic Secretary, Chawangngambo, Cultural Secretary Kawibamdibo, Joint Cultural Secretary Winikam aser Sports Secretary Longrenbo nunger lir.
Liangmai Welfare Society-i, tang shimer ketdangpurtem dang kin ajangzüktsü asoshi aser lokti tali sentaktepa akümtsü asoshi meranga inyaktsü temepishiba agütsüogo.
Chaga Gadi benjung ya Liangmai Welfare Society, Kohima-i ayong aser sobaliba ken o tsüngsang balala ajanga shilem agiba ajanga sentong tubor jungdakja liasü.